ის, რასაც მოსკოვმა „სამდღიანი ოპერაცია“ უწოდა, ოთხწლიანი უკრაინული წინააღმდეგობა გახდა, - ამის შესახებ უკრაინის საგარეო საქმეთა მინისტრი, ანდრეი სიბიგა სოციალურ ქსელში წერს.

„ოთხი წლის წინ რუსეთმა სრულმასშტაბიანი ომი დაიწყო, რათა უკრაინა რუკიდან გაექრო. ოთხი წლის შემდეგ უკრაინა კვლავ ადგილზე დგას - უფრო ძლიერი, ბრძოლაში გამოცდილი და გაუტეხელი. უკრაინა არ ჩამოიშალა. უკრაინა არ დანებდა. უკრაინა არ გაქრა“, - წერს სიბიგა X-ზე.

მისი თქმით, „უკრაინამ გლობალური უსაფრთხოების შესახებ დისკუსია შეცვალა“.

„ჩვენ დავამტკიცეთ, რომ თავისუფლება მხოლოდ რიტორიკას არ წარმოადგენს და მას დაცვა სჭირდება. ვაჩვენეთ, რომ საერთაშორისო სამართალი აბსტრაქტული ცნება არ არის და მისი დაცვა აუცილებელია. უკრაინის მხარდაჭერა ქველმოქმედება არ არის, ეს ინვესტიციის ჩადებაა სამყაროში, სადაც საზღვრების იძულებით შეცვლა არ ხდება, სადაც აგრესიას შედეგები მოჰყვება და სადაც გამძლეობა ტერორზე იმარჯვებს“, - აცხადებს უკრაინის საგარეო საქმეთა მინისტრი.