ტყუილ ანგარიშს რა მნიშვნელობა აქვს ჩვენთვის?! - რა ვქნა ახლა, ავყვე და ომი დავიწყო რუსეთის ფედერაციასთან იმიტომ, რომ იუკნევიჩიანემ მერე რეზოლუციაში რაღაც სისულელე არ ჩაწეროს?! ამას არ გავაკეთებთ!, - ამის შესახებ „ქართული ოცნების" დეპუტატმა, თენგიზ შარმანაშვილმა საქართველოს შესახებ ევროპარლამენტის საგარეო საქმეთა კომიტეტის ანგარიშის პროექტზე საუბრისას განაცხადა.

მისივე თქმით, ანგარიშს არანაირი ფასი არ აქვს.

„მიიღონ რეზოლუცია - უკვე მერამდენეა?! 107-ე ხომ?! ჩვენ ამას ყურადღებას აღარ მივაქცევთ, იმიტომ რომ იქ არ არის სიმართლის ნატამალიც კი, იქ ადამიანები პირდაპირ ტყუილი ნარატივების გავრცელებას აპირებენ. მათ ერთხელ მიიღეს რეზოლუცია, სასწრაფოდ გადაიყვანეთ მიხეილ სააკაშვილი საავადმყოფოშიო, როდესაც 4 თვის გადაყვანილი იყო. ასეთი ხალხია ეს. მთელ მსოფლიოს აგებინებდნენ, რომ თურმე სააკაშვილი ციხეში, საავადმყოფოში იყო გადასაყვანი, რეზოლუციაში ჩაწერეს გადაიყვანეთო და სინამდვილეში, რამდენიმე თვის გადაყვანილი იყო. როგორ უნდა შევხედოთ ამას სერიოზულად?! არც შევხედავთ!

ანგარიშს არანაირი ფასი არ აქვს. ტყუილ ანგარიშს რა მნიშვნელობა აქვს ჩვენთვის?! როდესაც იმთავითვე ვიცი, რომ არანაირი ობიექტურობის ნიშანწყალი იქ არ იქნება, რატომ უნდა დავინტერესდე ამ თვალსაზრისით?! რა ვქნა ახლა, ავყვე და ომი დავიწყო რუსეთის ფედერაციასთან იმიტომ, რომ იუკნევიჩიანემ მერე რეზოლუციაში რაღაც სისულელე არ ჩაწეროს?! ამას არ გავაკეთებთ!“, - განაცხადა შარმანაშვილმა.

ცნობისთვის, 25 თებერვალს ევროპარლამენტის საგარეო საქმეთა კომიტეტში საქართველოს შესახებ ანგარიშს წარადგენენ. ანგარიშს ევროპარლამენტის მუდმივი მომხსენებელი, რასა იუკნევიჩიენე წარადგენს. პროექტის თანახმად, ანგარიში ასახავს ფაქტს, რომ „საქართველოში დემოკრატიული უკუსვლა კიდევ უფრო მეტად გაძლიერდა“. ანგარიშის პროექტში აღნიშნულია, რომ „ქართული ოცნება“ ევროკავშირის, ოფიციალური პირებისა და დიპლომატების წინააღმდეგ „სისტემატურ კამპანიას აგრძელებს.