ქართულმა საზოგადოებამ დიდი ხანია იცის გერმანიის ელჩის ფარისევლობა, მისი ორმაგი სტანდარტი, მისი დამოკიდებულება საქართველოს მიმართ, რომ ჩვენ აქ ვგონივართ შესაწირი ზვარაკი - უნდოდათ, უკრაინას და საქართველოს შეგვეკავებინა რუსეთი, რათა დანარჩენი ევროპა გადარჩენილიყო, - ამის შესახებ პარლამენტის დიასპორის საკითხთა კომიტეტის თავმჯდომარემ, ირაკლი ზარქუამ საფრანგეთის, გერმანიისა და გაერთიანებული სამეფოს ელჩების განცხადების კომენტირებისას აღნიშნა.

მისი თქმით, ევროპა რუსეთის მიმართ სანქციების დაწესებისკენ მოგვიწოდებდა, „თავად ევროკავშირმა კი რუსეთთან ნავთობპროდუქტების ვაჭრობაში რეკორდები მოხსნა“.

როგორც ზარქუა აღნიშნავს, პრაგმატულ პოლიტიკას ალტერნატივა არ აქვს და საქართველოს ხელისუფლება ამ პოლიტიკას გააგრძელებს.

„ზოგადად, განსაკუთრებით, გერმანიის ელჩის ფარისევლობა, დიდი ხანია ქართულმა საზოგადოებამ იცის. მისი ორმაგი სტანდარტი, მისი დამოკიდებულება საქართველოს მიმართ, რომ ჩვენ აქ ვგონივართ შესაწირი ზვარაკი. ჩვენ დღესაც კი ვისმენთ ევროპარლამენტის ტრიბუნებიდან, თუ როგორ აქეზებენ უკრაინელებს და ამბობენ, „დიახ, ჩვენი უსაფრთხოებისთვის მნიშვნელოვანია რომ ომი გაგრძელდეს“. მოისმინეთ ლიეტუვას, ლატვიის, ესტონეთის წარმომადგენლების პოზიციები, რომ „დიახ, უკრაინაში ომი არის დანარჩენი ევროკავშირის უსაფრთხოება“. ეს იმაზე მეტყველებს, რომ სანამ ომი გრძელდება და რუსეთი უკრაინაში არის დაკავებული, ჩვენ აქ არაფერი გვემუქრებაო. ეს არის მიდგომა. ამისთვის იყო ეს ყველაფერი, უკრაინას და საქართველოს შეგვეკავებინა რუსეთი, რომ გადარჩენილიყო ესტონელი, ლატვიელი და დანარჩენი ევროპა. ეს იყო ამათი მიდგომა. ესენი ჩვენ სანქციებისკენ მოგვიწოდებდნენ და სტატისტიკა რომ აიღოთ, ევროკავშირმა ნავთობპროდუქტების ექსპორტში ვაჭრობაში რუსეთთან რეკორდები მოხსნა. 300 მილიარდზე მეტი შეუვიდა რუსეთს ბიუჯეტში ნავთობპროდუქტებით ვაჭრობაში. მეტსაც გეტყვით, ლატვიამ გადაგვასწრო ღვინით ექსპორტში რუსეთთან. ეს ხომ მონაცემებია?! ვის ატყუებენ?! ვის ეუბნებიან ამ სიგიჟეებს და სისულელეებს?! ლატვიამ ჩვენ - ღვინის სამშობლოს გადაგვასწრო რუსეთთან ექსპორტში და ეს ხალხი ჩვენ მოგვიწოდებს?! ეს არის ამათი მორალი, ორმაგი სახე, უსამართლო მიდგომები. კიდევ ერთხელ ვამბობთ - დღეს საქართველო არის შემდგარი სახელმწიფო, რომელსაც ჰყავს ლეგიტიმური მთავრობა, რომელიც ქართულ ღირებულებებზე, ინტერესებზე ზრუნავს. თქვენ ამის დემონსტრირებას ყოველდღიურად ხედავთ“, - განაცხადა ზარქუამ.