ეს რეფორმა იმის ნაცვლად, რომ განათლების სისტემაში უთანასწორობა აღმოფხვრას, კიდევ უფრო უთანასწოროს ხდის - შშმ ბავშვები სასიცოცხლო და მნიშვნელოვანი სერვისების მიღმა აღმოჩნდებიან,- ამის შესახებ უმაღლესი განათლების მკვლევარმა რუსუდან ჭანტურიამ განათლების რეფორმასთან დაკავშირებით განაცხადა.

მისი თქმით, განათლება მხოლოდ პრივილეგირებული სტუდენტებისთვის იქნება და ელიტური გახდება.

„მოკვლევა გავაკეთეთ, თუ რა გავლენა ექნება ამ განათლების რეფორმას შშმ პირებზე და აღმოჩნდა, რომ ეს რეფორმა მათთვის სტრუქტურულ ბარიერებს შექმნის. პირველი, უმაღლესი განათლების ხელმისაწვდომობაა, ის პრინციპები, რომელიც ჩადებულია ამ რეფორმაში - „1 ქალაქი - 1 ფაკულტეტი“ ბარიერს შეუქმნის მათთვის განათლების ხელმისაწვდომობას.

თბილისი მეტ-ნაკლებად ადაპტირებულია შშმ პირებისთვის. ამ ყველაფერზე საქართველოს მთავრობას არ უფიქრია. ეს რეფორმა, იმის ნაცვლად, რომ განათლების სისტემაში უთანასწორობა აღმოფხვრას, კიდევ უფრო უთანასწოროს ხდის.

საბოლოოდ კი, მივიღებთ იმას, რომ განათლება მხოლოდ პრივილეგირებული სტუდენტებისთვის იქნება და ელიტური გახდება.

შშმ პირები უმაღლესი განათლების მიღმა დარჩებიან, ამ რეფორმის შედეგად. ამ რეფორმის მავნებლობა და უარყოფითი შედეგები სცდება საუნივერსიტეტო სივრცესა და უმაღლეს განათლებას. მცირდება ან იზღუდება ისეთი მიმართულებები, რომლებიც მათთვის სასიცოცხლოდ მნიშვნელოვანია.

შშმ ბავშვები სასიცოცხლო და მნიშვნელოვანი სერვისების მიღმა აღმოჩნდებიან“,- განაცხადა რუსუდან ჭანტურიამ.