რუსეთის ნოვოროსიისკის პორტზე თავდასხმის შემდეგ აშშ-მა გაგვაფრთხილა, რომ ამან ამერიკის ეკონომიკურ ინტერესებზე გავლენა მოახდინა, - ამის შესახებ აშშ-ში უკრაინის ელჩმა, ოლგა სტეფანიშინამ განაცხადა.

„მოვისმინეთ, რომ ნოვოროსიისკის პორტზე უკრაინის დარტყმებმა ზოგიერთ ამერიკულ ინვესტიციაზე გავლენა მოახდინა, რომელიც ყაზახეთის მეშვეობით ხორციელდება. აშშ-ის სახელმწიფო დეპარტამენტისგან მოვისმინეთ, რომ ამერიკულ ინტერესებზე შეტევისგან თავი უნდა შევიკავოთ“, - განაცხადა აშშ-ში უკრაინის ელჩმა.

ელჩის ცნობით, აღნიშნულ საკითხზე აშშ-ის სახელმწიფო დეპარტამენტისგან დემარში მიიღო.

ამასთან, ოლგა სტეფანიშინას თქმით, აშშ-ის სახელმწიფო დეპარტამენტს უკრაინისთვის არ შეუთავაზებია, რომ ზოგადად, რუსეთის სამხედრო და ენერგეტიკულ ინფრასტრუქტურაზე დარტყმებისგან თავი შეიკავოს.

„ეს უკავშირდებოდა იმას, რომ იქ ამერიკის ეკონომიკური ინტერესები დაზარალდა. ჩვენ ეს გავითვალისწინეთ“, - აღნიშნა ელჩმა.

ცნობისთვის, უკრაინამ ნოვოროსიისკის პორტს გასული წლის ნოემბერში დაარტყა. თავდასხმა ნოვოროსიისკის საზღვაო პორტის წყლებში მდებარე კასპიის მილსადენის საერთაშორისო კონსორციუმის კრიტიკულ ინფრასტრუქტურაზე განხორციელდა. თავდასხმის შემდეგ კასპიის მილსადენის კონსორციუმის საზღვაო ტერმინალმა, რომლის მეშვეობითაც ყაზახეთი ნავთობის ექსპორტს ევროპასა და ამერიკის შეერთებულ შტატებში ახორციელებს, გადაზიდვები შეაჩერა.