რუსეთის სმოლენსკის ოლქში, ქიმიურ ქარხანაზე ათობით უკრაინული დრონის თავდასხმის შედეგად 7 ადამიანი დაიღუპა და 10 დაშავდა, - ინფორმაციას რუსული მედია საგამოძიებო კომიტეტზე დაყრდნობით ავრცელებს.

უწყების ცნობით, გამოძიება ტერორისტული აქტის ჩადენის ფაქტზე მიმდინარეობს.

გამომძიებლების თქმით, „უკრაინის შეიარაღებულმა ძალებმა სმოლენსკის რეგიონში, „დოროგობუჟის“ ქიმიურ ქარხანაზე, ასაფეთქებელი მოწყობილობებით აღჭურვილი მინიმუმ 30 უპილოტო საფრენი აპარატის გამოყენებით საჰაერო თავდასხმები განახორციელეს“.

„დაზიანდა ქარხნის ინფრასტრუქტურის ელემენტები, სახანძრო სადგურის შენობა და სპეციალური სახანძრო მანქანა, რამაც მნიშვნელოვანი ქონებრივი ზიანი მიაყენა მფლობელებს“, - ნათქვამია საგამოძიებო კომიტეტის განცხადებაში.

რუსული მედიის ცნობით, „დოროგობუჟი“ Acron Group-ის ნაწილია და აწარმოებს აზოტიან და რთულ სასუქებს, ასევე სამრეწველო პროდუქტებს.