ავღანეთისა და პაკისტანის სასაზღვრო ძალებს შორის შეტაკებები მოხდა. ამის შესახებ ინფორმაციას გამოცემა Reuters-ი ავრცელებს.

გამოცემის ცნობით, პაკისტანისა და ავღანეთის სასაზღვრო ძალებს შორის შეტაკებები 26 თებერვალს ღამე მოხდა, მას შემდეგ, რაც თალიბანმა ე.წ. "საპასუხო დარტყმები" დაიწყო პაკისტანის ინფრასტრუქტურაზე.

კერძოდ, ავღანეთის ძალებმა ორი საათის განმავლობაში ცეცხლი გაუხსნეს პაკისტანის ჩრდილოეთ-დასავლეთის მთიან რეგიონში მდებარე პოსტებს იქამდე, სანამ პაკისტანის ძალებმა არ უპასუხეს.

პაკისტანმა მოგვიანებით განაცხადა, რომ ის რეაგირებდა ავღანეთის ძალების მიერ საზღვრის გასწვრივ რამდენიმე ადგილას განხორციელებულ „არაპროვოცირებულ ცეცხლზე“.

კერძოდ, განცხადების თაანხმად, პაკისტანის ჯარებმა „დაუყოვნებლივი და ეფექტური რეაგირება მოახდინეს“, რამაც მსხვერპლი გამოიწვია. აღინიშნება, რომ პაკისტანი ყველა საჭირო ზომას მიიღებს თავისი ტერიტორიული მთლიანობისა და მოქალაქეების დასაცავად.