ხამენეი, ისტორიაში ერთ-ერთი ყველაზე ბოროტი ადამიანი, მკვდარია,- ამის შესახებ აშშ-ის პრეზიდენტი დონალდ ტრამპი სოციალურ ქსელში წერს.

მისი თქმით, ეს არა მხოლოდ ირანის ხალხისთვისაა სამართლიანობა, არამედ ,,ყველა დიდებული ამერიკელისთვის და მსოფლიოს მრავალი ქვეყნიდან ჩამოსული ადამიანებისთვის, რომლებიც ხამენეის და მისი სისხლისმსმელი ბანდიტების მიერაა მოკლული ან დასახიჩრებული".

„მას არ შეეძლო ჩვენი დაზვერვისა და მაღალტექნოლოგიური თვალთვალის სისტემების თავიდან აცილება და ისრაელთან მჭიდრო თანამშრომლობით, მას ან მასთან ერთად მოკლულ სხვა ლიდერებს არაფრის გაკეთება არ შეეძლოთ. ეს ირანელი ხალხისთვის უდიდესი შანსია, დაიბრუნოს თავისი ქვეყანა.

ჩვენ გვესმის, რომ მათი IRGC-ის, სამხედრო და სხვა უსაფრთხოებისა და პოლიციის ძალების ბევრ წევრს აღარ სურს ბრძოლა და ჩვენგან იმუნიტეტს ეძებენ. როგორც გუშინ ღამით ვთქვი, „ახლა მათ შეუძლიათ იმუნიტეტი ჰქონდეთ, მოგვიანებით მხოლოდ სიკვდილი ელით!“ იმედია, IRGC და პოლიცია მშვიდობიანად გაერთიანდება ირანელ პატრიოტებთან და ერთად იმუშავებენ, რათა ქვეყანა დაუბრუნონ იმ დიდებულებას, რომელსაც ის იმსახურებს. ეს პროცესი მალე უნდა დაიწყოს, რადგან არა მხოლოდ ხამენეი მოკვდა, არამედ ქვეყანა, სულ რაღაც ერთ დღეში, ძალიან განადგურდა. ძლიერი და ზუსტი დაბომბვა გაგრძელდება შეუფერხებლად მთელი კვირის განმავლობაში ან იმდენ ხანს, რამდენიც საჭირო იქნება ჩვენი მიზნის მისაღწევად - მშვიდობის დამყარება მთელ ახლო აღმოსავლეთში და, რა თქმა უნდა, მთელ მსოფლიოში!“,- წერს ტრამპი.