ომანის სანაპიროსთან ნავთობტანკერს დაარტყეს, რის შედეგადაც ოთხი ადამიანი დაშავდა, - ინფორმაციას BBC-ი ომანის საზღვაო უსაფრთხოების ცენტრზე დაყრდნობით ავრცელებს.

საინფორმაციო ცენტრის ცნობით, პალაუს რესპუბლიკის დროშის ქვეშ მცურავ ნავთობტანკერს, Skylight-ს, ქვეყნის ჩრდილოეთით, ხასაბის პორტიდან დაახლოებით 8 კილომეტრის დაშორებით დაესხნენ თავს.

თავდასხმის შედეგად ეკიპაჟის ოთხი წევრი დაშავდა, 20 მგზავრის, მათ შორის ინდოეთის 15 და ირანის 5 მოქალაქის ევაკუაცია განხორციელდა. საზღვაო უსაფრთხოების ცენტრმა არ დააკონკრეტა, რით დაესხნენ თავს ტანკერს.

ამასთან, Reuters-ის ინფორმაციით, Skylight-ის რეგისტრირებული მფლობელია Sea Force Inc-ი და მას Red Sea Ship Management-ი მართავს. 2025 წლის დეკემბერში აშშ-ის ფინანსთა სამინისტრომ Red Sea Ship Management-სა და Skylight-ს სანქციები დაუწესა, რადგან მმართველი კომპანია და მისი მფლობელი სპარსეთის ყურეში ირანული ნავთობის ტრანსპორტირებისთვის „ჩრდილოვანი ფლოტის“ მართვაში დაადანაშაულა.