ახლო აღმოსავლეთში უმძიმესი მდგომარეობაა შექმნილი - ირანი იქნება თუ ისრაელი, სამძიმარს ვუცხადებთ, სადაც მშვიდობიანი მოსახლეობა დაიღუპა, - ამის შესახებ პარლამენტის ვიცე-სპიკერმა, ნინო წილოსანმა ახლო აღმოსავლეთში განვითარებულ მოვლენებზე საუბრისას განაცხადა.

მისი თქმით, ყველა ჩართულ სახელმწიფოს მოუწოდებენ, რომ დიპლომატიური საშუალებები მაქსიმალურად იყოს გამოყენებული.

„ახლო აღმოსავლეთში უმძიმესი მდგომარეობაა შექმნილი. რეგიონში მიმდინარე წარმოუდგენელი არეულობა დიდ შეშფოთებას იწვევს. ირანი იქნება თუ ისრაელი, სამძიმარს ვუცხადებთ, სადაც მშვიდობიანი მოსახლეობა დაიღუპა. დიდი დანაკარგი ინფრასტრუქტურის მიმართულებითაც არის. სამხედრო ჩარევის მასშტაბი წარმოუდგენლად დიდია. რა თქმა უნდა, ამ სიტუაციის დეესკალაციას ვემხრობით დიპლომატიური არხების საშუალებით, რადგან ომი და სამხედრო დაპირისპირება გამოსავალი არ არის. ყველა ჩართულ სახელმწიფოს მოვუწოდებთ, რომ დიპლომატიური საშუალებები მაქსიმალურად იყოს გამოყენებული“, - განაცხადა წილოსანმა.

კითხვაზე, რომელიც საქართველოს მთავრობის განცხადებას შეეხებოდა, წილოსანმა უპასუხა, რომ ამ სამძიმარს უერთდება.

„იცით, რომ მთავრობამ სამძიმარი გამოუცხადა ყველა ქვეყანას, რომელიც ამ სამხედრო ესკალაციის პროცესშია ჩართული, ყველა იქ გარდაცვლილს - როგორც სახელისუფლებო, ასევე მშვიდობიან მოქალაქეს. ამ სამძიმარს, რა თქმა უნდა, ვუერთდები”, - განაცხადა წილოსანმა.

კითხვაზე, „მკვლელს რომ კლავს აშშ, ეს არის თუ არა სამძიმრის საფუძველი“, წილოსანმა უპასუხა, რომ ყველა ქვეყნის კანონმდებლობაში მკვლელის მკვლელობა არ არის მისალმების საგანი.

„მარტივი პრინციპიც არ იცით როგორ მოქმედებს ადამიანის უფლებები და დემოკრატია. მკვლელის მკვლელი სამართლებრივად კონკრეტული დეფინიციაა. უფრო დიდ მასშტაბზე არ გადავდივარ. ყველა ქვეყნის კანონმდებლობაში მკვლელის მკვლელობა არ არის მისალმების საგანი.

სამძიმართან დაკავშირებით იხილეთ მთავრობის განცხადება, სადაც ყველა უმძიმეს ფაქტთან არის სამძიმარი გამოთქმული”, - განაცხადა ნინო წილოსანმა.