დონალდ ტრამპმა და კირ სტარმერმა ტელეფონით ახლო აღმოსავლეთში არსებული ვითარება და „საჰაერო ძალების ბაზების გამოყენების“ საკითხი განიხილეს
დიდი ბრიტანეთის პრემიერ-მინისტრმა კირ სტარმერმა და აშშ-ის პრეზიდენტმა დონალდ ტრამპმა სატელეფონო საუბარი გამართეს.
დიდი ბრიტანეთის პრემიერ-მინისტრის ოფისის პრესსპიკერის განცხადებით, მათ ახლო აღმოსავლეთში არსებული ვითარება და დიდ ბრიტანეთსა და აშშ-ს შორის სამხედრო თანამშრომლობის საკითხი განიხილეს.
განცხადების თანახმად, საკითხი მოიცავდა „საჰაერო ძალების ბაზების გამოყენებას რეგიონში პარტნიორების კოლექტიური თავდაცვის მხარდასაჭერად“.
„პრემიერ-მინისტრმა ასევე გულწრფელი სამძიმარი გამოუცხადა პრეზიდენტ ტრამპს და ამერიკელ ხალხს ექვსი ამერიკელი ჯარისკაცის დაღუპვის გამო“, - დასძენს პრესსპიკერი.
ბრიტანული მედიის თანახმად, საუბარი მას შემდეგ შედგა, რაც დონალდ ტრამპმა დიდი ბრიტანეთი აშშ-ის “ოდესღაც დიდ მოკავშირედ“ მოიხსენია და სტარმერს მიმართა, რომ „ჩვენ არ გვჭირდება ადამიანები, რომლებიც ომებში უკვე გამარჯვების შემდეგ ერთვებიან“.
