ავსტრალიამ ირანის ქალთა ეროვნულ საფეხბურთო ნაკრებს თავშესაფარი უნდა მისცეს, - ამის შესახებ აშშ-ის პრეზიდენტი, დონალდ ტრამპი სოციალურ ქსელში წერს.

„ავსტრალია საშინელ ჰუმანიტარულ შეცდომას უშვებს ირანის ქალთა ეროვნული საფეხბურთო ნაკრების ირანში იძულებით დაბრუნებით, სადაც მათ, დიდი ალბათობით, მოკლავენ“, - წერს ტრამპი Truth Social-ზე.

მისი თქმით, თუ ირანის ქალთა ეროვნულ საფეხბურთო ნაკრებს ავსტრალია არ მიიღებს, მაშინ ამას აშშ გააკეთებს.

ცნობისთვის, ავსტრალია აზიის თასს მასპინძლობს, რომელმაც სათავე მაშინ აიღო, როდესაც აშშ-მა და ისრაელმა ირანის წინააღმდეგ შეტევა დაიწყეს. ირანის ქალთა ეროვნული საფეხბურთო ნაკრების ფეხბურთელებმა ტურნირის პირველი მატჩისას ჰიმნი არ შეასრულეს. ირანის ეროვნული ნაკრები ტურნირს კვირას გამოეთიშა.

Sky News-ის ინფორმაციით, საწვრთნელი ბანაკიდან ირანის ეროვნული ნაკრების ხუთი ფეხბურთელი გაიქცა და ავსტრალიას თავშესაფრის თხოვნით მიმართეს.