უკრაინის, აშშ-ისა და რუსეთის წარმომადგენლებს შორის მიმდინარე კვირაში დაგეგმილი სამმხრივი შეხვედრა გადაიდო, - ამის შესახებ უკრაინის პრეზიდენტი ვოლოდიმირ ზელენსკი სოციალურ ქსელში წერს.

„ამ მომენტისთვის პარტნიორების მთელი ყურადღება ირანის გარშემო არსებულ ვითარებაზეა გადატანილი და ამის გამო, მიმდინარე კვირაში დაგეგმილი შეხვედრა ამერიკელების წინადადებით გადაიდო“, - წერს ზელენსკი X-ზე.

მისი თქმით, უკრაინა ომის დასრულების მიზნით ნებისმიერ მომენტში და ნებისმიერ ფორმატში მზად არის შეხვედრისთვის.

„ვხედავთ, რომ რუსები ახლო აღმოსავლეთსა და სპარსეთის ყურეში არსებული ვითარების მანიპულირებას თავიანთი აგრესიის სასარგებლოდ ცდილობენ. ასევე, ცდილობენ ირანის დარტყმები მის მეზობლებსა და ამერიკულ ბაზებზე ფაქტობრივად რუსეთის ომის მეორე ფრონტად აქციონ უკრაინის და უფრო ფართო გაგებით, მთელი დასავლეთის წინააღმდეგ. ბოროტებას კოორდინაციის შესაძლებლობა არ უნდა მიეცეს“, - აცხადებს უკრაინის პრეზიდენტი.