ჯო უილსონი საქართველო-ამერიკა ურთიერთობების გადატვირთვის დაზიანებას ცდილობს - ეს არის უსაფუძვლო ბრალდება, სხვა არაფერი, - ამის შესახებ პარლამენტის ევროპასთან ინტეგრაციის კომიტეტის თავმჯდომარემ, ლევან მახაშვილმა განაცხადა, რითაც გამოეხმაურა კონგრესმენის, ჯო უილსონის განცხადებას.

მისი თქმით ჯო უოლსონს სერიოზულად ამერიკაშიც არ აღიქვამენ.

„ამ ადამიანის ინტერესები ჩვენ ვნახეთ - ეს არის კონკრეტული ფინანსური პოლიტიკური ინტერესები, რომელიც პირდაპირ არის მიბმული „ნაციონალურ მოძრაობასთან“, ამიტომ გასაგებია მისგან ეს ჭორაობა და ამ ტიპის უსაფუძვლო ბრალდებები. ეს არის უსაფუძვლო ბრალდება, სხვა არაფერი. შეხედოს საკუთარი ქვეყნის პოლიტიკას, რა პოლიტიკას აწარმოებს. ეს ადამიანი საქართველოს აბამს იმ თემებზე, რაც არის ნეგატიურად და მტკივნეულად აღქმული საკუთარ ქვეყანაში. ამით ცდილობს საქართველო-ამერიკა ურთიერთობების გადატვირთვის დაზიანებას, მათ შორის, იმ ძალიან პოზიტიური შეხვედრების დინამიკის და ურთიერთობების, რაც იყო ბოლო პერიოდის განმავლობაში, მათ შორის, ჩემი კოლეგების ამერიკაში ვიზიტის დროს. ამით არის ნაკარნახევი მთელი ეს პროცესი," - განაცხადა მახაშვილმა.

ცნობისთვის, ამერიკელმა კონგრესმენმა, ჯო უილსონმა (რესპუბლიკური პარტია) სოციალურ ქსელში დაწერა: „ანტიამერიკული პარტია „ქართული ოცნება“ ძალიან შეშინებულია, რომ ამერიკელები გაიგებენ, რომ ის ირანის რეჟიმთან თანამშრომლობს, ამიტომ ყველაფერს აკეთებენ, გააჩუმონ ექსპერტები" - ირანის დასამარცხებლად „ქართული ოცნება“ დაამარცხეთ".