საქართველოს საპარლამენტო დელეგაციამ ევროპარლამენტსა და ევროპის საბჭოში შეხვედრები გამართა. ამის შესახებ ინფორმაციას პარლამენტის პრესსამსახური ავრცელებს.

როგორც გავრცელებულ ინფორმაციაშია ნათქვამი, სტრასბურგში ვიზიტის ფარგლებში, პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარის პირველმა მოადგილემ გიორგი ჩაკვეტაძემ და ევროპასთან ინტეგრაციის კომიტეტის თავმჯდომარის პირველმა მოადგილემ ვახტანგ თურნავამ ევროპარლამენტის წევრებთან და ევროპის საბჭოს წარმომადგენლებთან შეხვედრები გამართეს.

„შეხვედრებზე განსაკუთრებული ყურადღება დაეთმო ევროპის საბჭოს საპარლამენტო ასამბლეაში საქართველოს მუდმივმოქმედი საპარლამენტო დელეგაციის დაბრუნების თემატიკას. სამუშაო შეხვედრებზე, დელეგაციის წევრებმა ევროპის საბჭოს წარმომადგენლებს ინფორმაცია მიაწოდეს საქართველოს ხელისუფლების გადადგმულ ნაბიჯებსა და სამომავლო გეგმებზე.

ევროპელ კოლეგებთან შეხვედრებზე საპარლამენტო დელეგაციის წევრებმა განიხილეს როგორც საქართველო-ევროკავშირის ურთიერთობები, ისე რეგიონული სტაბილურობისა და უსაფრთხოების კუთხით გამოწვევები.

სტრასბურგში საპარლამენტო დელეგაციის ვიზიტი 10-12 მარტს გაიმართა. საპარლამენტო დელეგაციის წევრებთან ერთად შეხვედრებს ესწრებოდნენ ევროპის საბჭოში საქართველოს მუდმივი წარმომადგენელი ხატია წილოსანი და ევროკავშირში საქართველოს მუდმივი წარმომადგენლის მოადგილე გიორგი მიქელაძე“, - ნათქვამია ინფორმაციაში.