აგრარულ სფეროში მომუშავე ქალთა მხარდასაჭერად, ბიზნესისა და ტექნოლოგიების უნივერსიტეტმა პარტნიორობა ინდურ ორგანიზაცია ADGA EXIM LLP-თან დაიწყო. აღნიშნული პარტნიორობის შესახებ შეთანხმება მიღწეულ იქნა მსოფლიო ეკონომიკური ფორუმის ფარგლებში, დავოსში და ის მიზნად ისახავს მეწარმე ქალთა გაძლიერებას აგრარულ სფეროში, აგრარული ტექნოლოგიების დანერგვას მათ ბიზნეს საქმიანობაში, Climate Smart Agriculture საკითხის გარშემო ცნობიერების ზრდას და სექტორში დასაქმებულ მუშაკთა შორის სამეწარმეო უნარების განვითარებას.

აღნიშნული ინიციატივა სტარტს აიღებს საქართველოში და ინდოეთში, შემდეგ კი ეტაპობრივად განვითარდება სამხრეთ კავკასიის, აღმოსავლეთ ევროპის და ცენტრალური აზიის ქვეყნებში.

თანამშრომლობა მოიცავს:

• ერთობლივი საგანმანათლებლო პროგრამების, ტრენინგებისა და გადამზადების ინიციატივების განვითარებას ქალებისთვის აგრიტექის მიმართულებით;
• ტრენერების, მენტორებისა და საერთაშორისო ექსპერტების გაცვლას;
• სემინარების, ვორქშოპების, ვებინარებისა და კონფერენციების ორგანიზებას;
• კვლევით და ინოვაციურ პროექტებში თანამშრომლობას, განსაკუთრებით მდგრადი სოფლის მეურნეობის მიმართულებით;
• ქალთა მიერ დაფუძნებული სტარტაპების მხარდაჭერას, მენტორინგსა და საერთაშორისო ქსელებზე წვდომის უზრუნველყოფას;
• საქართველოსა და ინდოეთს შორის სავაჭრო და ბაზარზე გასვლის შესაძლებლობების განვითარებას.

BTU, გაეროს ქალთა გაძლიერების პრინციპების (WEPS) შესაბამისად, აქტიურად უწყობს ხელს გენდერული თანასწორობის დაცვას, ქალთა ლიდერობის განვითარებას და მათი პროფესიული შესაძლებლობების გაძლიერებას სხვადასხვა სექტორში.

(R)