სიონის საპატრიარქო ტაძარში, ილია მეორის საფლავზე, მრევლი პატივის მისაგებად დილიდან მიდის.

ასევე დღეს ილია მეორის გარდაცვალების მეცხრე და ავტოკეფალიის აღდგენის დღესთან დაკავშირებით, საპატრიარქო ტახტის მოსაყდრე, სენაკისა და ჩხოროწყუს მიტროპოლიტი მეუფე შიო სიონის ტაძარში პარაკლისსა და პანაშვიდს გადაიხდის.

მსახურება სიონის ტაძარში 14:00 საათზე დაიწყება.

„დღეს ილია მეორის გარდაცვალების მეცხრე დღე შესრულდა. მოგეხსენებათ, მეცხრე დღე, როგორც მეორმოცე დღე განსაკუთრებულია. დღეს არის ავტოკეფალიის აღდგენის დღეც, რომელსაც ილია მეორე განსაკუთრებულ მნიშვნელობას ანიჭებდა და ყოველ წელს პარაკლისს იხდიდა აქ. დღეს აქ შესრულდება პარაკლისი ავტოკეფალიის აღდგენასთან დაკავშირებით, შემდეგ კი პანაშვიდი ილია მეორისადმი”,- აღნიშნავს სამების საკათედრო ტაძრის მღვდელმსახური, არქიმანდრიტი იოვანე მჭედლიშვილი.

ცნობისთვის, სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე 17 მარტს გარდაიცვალა. 18 მარტიდან სამების ტაძარში მისი სამოქალაქო პანაშვიდი მიმდინარეობდა. უწმინდესის ხსოვნას ათასობით მოქალაქემ პატივი მიაგო.

ილია მეორე 22 მარტს, სიონის საპატრიარქო ტაძარში დაკრძალეს.