პიტერ სიიარტო - „დაზვერვის აგენტებმა“ კიდევ ერთი „მნიშვნელოვანი აღმოჩენა“ გააკეთეს: დაამტკიცეს, რომ საჯაროდ იგივეს ვამბობ, რასაც ტელეფონზე
უნგრეთის საგარეო საქმეთა მინისტრი პიტერ სიიარტო რუსეთის საგარეო საქმეთა მინისტრ სერგეი ლავროვთან მისი საუბრების გაჟონილ აუდიოჩანაწერებს ეხმაურება.
სიიარტოს მტკიცებით, გარკვეული პერიოდის განმავლობაში იცოდა, რომ უნგრელი ჟურნალისტების აქტიური დახმარებით უცხოური დაზვერვის სამსახურები მის სატელეფონო საუბრებს ისმენდნენ.
„დღეს „დაზვერვის აგენტებმა“ კიდევ ერთი „მნიშვნელოვანი აღმოჩენა“ გააკეთეს: მათ დაამტკიცეს, რომ საჯაროდ იგივეს ვამბობ, რასაც ტელეფონზე. შესანიშნავი სამუშაოა!“ - აღნიშნა უნგრეთის საგარეო საქმეთა მინისტრმა.
მისი თქმით, „სანქციების პოლიტიკა წარუმატებელია; ის უფრო მეტ ზიანს აყენებს ევროკავშირს, ვიდრე რუსეთს“.
„ჩვენ ასევე უამრავჯერ ნათლად განვაცხადეთ, რომ არასდროს დავუშვებთ სანქციების დაწესებას იმ პირების ან კომპანიების მიმართ, რომლებიც მნიშვნელოვანია უნგრეთის ენერგომომარაგების უსაფრთხოებისთვის ან მშვიდობის მისაღწევად, ან იმ პირების მიმართ, ვისთვისაც უბრალოდ არ არსებობს საფუძველი ან გამართლება სანქციების სიაში შეტანისთვის“, - აღნიშნა სიიარტომ.
მისი თქმით, სანქციების საკითხთან დაკავშირებით რეგულარულად მართავს კონსულტაციებს ევროკავშირის ბევრი არაწევრი ქვეყნის საგარეო საქმეთა მინისტრებთან.
შეგახსენებთ, დღეს მედიაში ლავროვსა და სიიარტოს შორის საუბრების აუდიოჩანაწერები გამოქვეყნდა. ერთ-ერთი საუბარი რუსი ოლიგარქის, ალიშერ უსმანოვის დის, გულბაჰორ ისმაილოვას წინააღმდეგ ევროკავშირის სანქციების მოხსნის ლობირებას ეხებოდა.
