NMG-სა (ნიკორა მენეჯმენტ ჯგუფი) და კოლეჯ „სპექტრს“ შორის ურთიერთთანამშრომლობის მემორანდუმი გაფორმდა. თანამშრომლობა მიზნად ისახავს ახალგაზრდებისთვის დეფიციტურ და მოთხოვნად ტექნიკურ პროფესიებში განათლების მხარდაჭერასა და დასაქმების შესაძლებლობების გაძლიერებას.

ახალი საგანმანათლებლო ინიციატივის ფარგლებში, კოლეჯში სწავლება რეალურ საწარმოო გამოცდილებას დაუკავშირდება. რამდენიმე სტუდენტი საწარმოო პრაქტიკას გაივლის NMG-ის შვილობილ კომპანიებში მათთვის მისაღები მოქნილი სამუშაო გრაფიკით. ეს სტუდენტებს მისცემს შესაძლებლობას, თეორიული ცოდნა პრაქტიკაში გარდაქმნან.

სტუდენტები მიიღებენ:

• პრაქტიკულ სამუშაო გამოცდილებას;
• სტიპენდიას;
• სამუშაო საათებში უფასო ლანჩს.

როგორც NMG-ში განმარტავენ, სწავლის დასრულების შემდეგ, სურვილის შემთხვევაში მათ სრულ განაკვეთზე დასაქმების შესაძლებლობა ექნებათ.

„გვჯერა, რომ პროფესიული განათლებისა და ბიზნესის თანამშრომლობა ქმნის ისეთ შესაძლებლობებს, რომლებიც ახალგაზრდებისთვის კარიერულ გზას უფრო ხელმისაწვდომს და პრაქტიკულს ხდის. პროფესიული განათლების მხარდაჭერა და ახალგაზრდებისთვის რეალური დასაქმების გზების შექმნა, ქვეყნის მდგრადი განვითარების ერთ-ერთი მნიშვნელოვანი საფუძველია“, - აცხადებს NMG-ის გენერალური დირექტორის მოადგილე დავით ურუშაძე.

კორპორაციული სოციალური პასუხისმგებლობის ფარგლებში NMG-მ წლების განმავლობაში არაერთი მნიშვნელოვანი პროექტი განახორციელა განათლების, გარემოს დაცვისა და შრომითი უფლებების მიმართულებით. კომპანია განსაკუთრებულ მნიშვნელობას ანიჭებს იმ პროფესიული მიმართულებების მხარდაჭერას, რომლებზეც დღეს შრომის ბაზარზე მაღალი მოთხოვნაა. მათ შორისაა ტექნიკური სპეციალობები, რაც საწარმოო და ტექნოლოგიური პროცესების მართვისთვის კრიტიკულად მნიშვნელოვანია.