დამოუკიდებლობა არ არის მხოლოდ წარსულის მონაპოვარი, ის ნიშნავს ყოველდღიურ პასუხისმგებლობას - სახელმწიფოს გაძლიერებას, ეროვნული ინტერესების დაცვას და ისეთი გარემოს შექმნას, სადაც თითოეულ მოქალაქეს აქვს განვითარების შესაძლებლობა, - ამის შესახებ „ლელო-ძლიერი საქართველოს“ ერთ-ერთი ლიდერი ირაკლი კუპრაძე სოციალურ ქსელში წერს.

კუპრაძის შეფასებით, 31 მარტი არის დღე, რომელმაც მკაფიოდ აჩვენა ქართველი ხალხის ნება - ვიცხოვროთ დამოუკიდებელ და სუვერენულ სახელმწიფოში.

„ჩვენი ქვეყნის ისტორიისთვის 1991 წლის რეფერენდუმი უდიდესი მოვლენა იყო - საზოგადოებამ ერთხმად დააფიქსირა არჩევანი, ეცხოვრა დამოუკიდებელ და სუვერენულ სახელმწიფოში. ეს იყო არა მხოლოდ პოლიტიკური გადაწყვეტილება, არამედ ეროვნული ღირსების, სიმამაცისა და მომავლის რწმენის გამოხატულება.

სწორედ ამ ერთიანობამ შექმნა საფუძველი ჩვენი სახელმწიფოებრიობის აღდგენისათვის. საზოგადოების ნებამ განსაზღვრა ქვეყნის გზა - თავისუფლებისა და დამოუკიდებლობისკენ”, - წერს კუპრაძე სოციალურ ქსელ „ფეისბუქზე“.