საქართველოში დღეს დემოკრატია არა მხოლოდ ზეწოლის ქვეშაა, არამედ სისტემატურად იშლება როგორც ეროვნულ, ისე ადგილობრივ დონეზე - ჩვენ მოგიწოდებთ: ნუ დატოვებთ ქართველ ხალხს მარტო ამ ბრძოლაში, - ამის შესახებ პარტია „გახარია საქართველოსთვის“ წევრმა ბელა მოსიამ ევროპის საბჭოში განაცხადა.

ბელა მოსიას თქმით, ის, რაც საქართველოში ხდება, არ არის მხოლოდ შიდა პრობლემა, არამედ ევროპის პრობლემაცაა.

„ძვირფასო კოლეგებო, ჩამოვედი საქართველოდან, სადაც დღეს დემოკრატია არამხოლოდ ზეწოლის ქვეშაა, არამედ სისტემატურად იშლება როგორც ეროვნულ, ისე ადგილობრივ დონეზე. მე წარმოვადგენ პარტიას „საქართველოსთვის“, რომლის თავმჯდომარეა საქართველოს ყოფილი პრემიერ-მინისტრი, გიორგი გახარია - ქვეყნის ერთ-ერთი პროგრესული ოპოზიციური ძალის ლიდერი. მე ვსაუბრობ არა მხოლოდ ჩემი პარტიის სახელით, არამედ როგორც იმ დემოკრატიული ოპოზიციის ნაწილი, რომელიც აგრძელებს ბრძოლას საქართველოს ევროპული მომავლისთვის.

როგორც თქვენს ფაქტების დამდგენ ანგარიშში ნათლად არის აღნიშნული, საქართველოში ადგილობრივი დემოკრატია საფრთხის ქვეშაა, რაც გამოიხატება ძალაუფლების კონცენტრაციით, ოპოზიციაზე ზეწოლითა და დემოკრატიული სივრცის შეზღუდვით.

ჩვენ ამას ყოველდღიურად ვხედავთ: თითქმის ყველა ოპოზიციური ლიდერი ან ციხეშია, ან სისხლისსამართლებრივ დევნას განიცდის, რაც პირდაპირ მიმართულია პოლიტიკური პლურალიზმის წინააღმდეგ, რომელიც დემოკრატიის ქვაკუთხედია. მაგალითად, მე წარმოვადგენ პარტიას, რომლის ლიდერს, ყოფილ პრემიერ-მინისტრ გახარიას, ორჯერ დაესხნენ თავს ფიზიკურად, მის წინააღმდეგ პოლიტიკურად მოტივირებული ორი სისხლისსამართლებრივი საქმეა აღძრული და ახლა იძულებულია პოლიტიკური ბრძოლა საქართველოს ფარგლებს გარედან გააგრძელოს.

მედია არის პირდაპირი პოლიტიკური ზეწოლის ქვეშ, ჟურნალისტები დევნის სამიზნეები არიან; დღეს მზია ამაღლობელი, დამოუკიდებელი ჟურნალისტი და მედიის დამფუძნებელი, პატიმრობაშია - რაც დამოუკიდებელი ხმის ჩახშობის ნათელი მაგალითია. სამოქალაქო საზოგადოებას მიზანმიმართულად დევნიან დემოკრატიული სივრციდან დრაკონული კანონების მეშვეობით, რომლებიც მიზნად ისახავს დამოუკიდებელი აქტორების იზოლაციას, დისკრედიტაციასა და საბოლოოდ, მათ კონტროლს.

მე წარმოვადგენ უმაღლესი განათლების სფეროს, სადაც მიმდინარე რეფორმები ანგრევს საუნივერსიტეტო ავტონომიასა და აკადემიურ თავისუფლებას, განსაკუთრებით რეგიონულ უნივერსიტეტებში.

ძვირფასო კოლეგებო, დემოკრატია საქართველოში არ გამქრალა; არამედ მისთვის ბრძოლა გრძელდება. ჩვენს პარტიას მტკიცედ სჯერა, რომ „ქართული ოცნების“ რეჟიმის მცდელობების საპასუხოდ, მოახდინოს საქართველოს იზოლაცია, ყველა პოლიტიკური სივრცე, იქნება ეს ადგილობრივი, ეროვნული თუ საერთაშორისო სივრცე, აქტიურად უნდა გამოვიყენოთ ქართველი ხალხის ევროპული არჩევანის დასაცავად. სწორედ ამიტომ არის ეს კონგრესი მნიშვნელოვანი და სწორედ ამიტომაა თქვენი ჩართულობა გადამწყვეტი. რადგან ის, რაც საქართველოში ხდება, არ არის მხოლოდ შიდა პრობლემა. ეს ევროპის პრობლემაცაა.

ეუთოს „მოსკოვის მექანიზმის“ ამოქმედება ადასტურებს, რომ საქართველოში მიმდინარე მოვლენები საერთაშორისოდაა დანახული. მისი დასკვნები ნათელია: ეს არის დემოკრატიის მიზანმიმართული დემონტაჟი, რომელიც ხასიათდება ძალადობით, ოპოზიციასა და მედიაზე ზეწოლით და სახელმწიფო ინსტიტუტების გამოყენებით კრიტიკული ხმების ჩასახშობად. ანგარიში მოითხოვს პოლიტიკური პატიმრების გათავისუფლებას - ეს არის მთავარი ტესტი იმისა, იქნება თუ არა ეს წუხილები გათვალისწინებული.

საქართველო, ქვეყანა, რომელიც რეგიონში დემოკრატიული ლიდერი და უსაფრთხოებისა და თავდაცვის საკითხებში სანდო პარტნიორი იყო, ევროკავშირის წევრობის კანდიდატი სახელმწიფო, დღეს, მმართველობის არსებული მოდელით, სულ უფრო მეტად ემსგავსება მისსავე ოკუპანტ სახელმწიფოს - რუსეთს.

და მაინც, მიუხედავად ამისა, ერთი რამ რჩება უცვლელი: ქართველი ხალხის ნება, იბრძოლოს თავისი კუთვნილი ადგილისთვის ევროპულ ოჯახში.

ამიტომაც, ჩვენ მოგიწოდებთ: ნუ დატოვებთ ქართველ ხალხს მარტო ამ ბრძოლაში! გმადლობთ!“, - ნათქვამია ბელა მოსიას მიერ ევროპის საბჭოში წარმოთქმულ სიტყვაში.