ცეცხლის შეწყვეტის შესახებ ირანის საპასუხო წინადადება მნიშვნელოვანია, თუმცა საკმარისად კარგი არ არის, - ამის შესახებ აშშ-ის პრეზიდენტმა, დონალდ ტრამპმა თეთრ სახლში სააღდგომო კვერცხების გაგორების ტრადიციულ ღონისძიებაზე ჟურნალისტებს განუცხადა.

„მათ წინადადება შემოგვთავაზეს. ის საკმარისად კარგი არ არის, თუმცა მნიშვნელოვანი ნაბიჯია“, - განაცხადა ტრამპმა.

ასევე, დონალდ ტრამპმა კიდევ ერთხელ გაიმეორა მისი მუქარა იმ შემთხვევაში, თუ თეირანი შეთანხმებას არ დათანხმდება.

„მათ ხიდები და ელექტროსადგურები აღარ ექნებათ. აღარაფერი ექნებათ. ამაზე შორს აღარ წავალ, რადგან არსებობს სხვა რაღაცებიც, რაც ამ ორზე უარესია“, - აღნიშნა აშშ-ის პრეზიდენტმა.

ცნობისთვის, დონალდ ტრამპმა ირანს შეთანხმების დასადებად დრო სამშაბათს, საღამოს 8 საათამდე (თბილისის დროით ოთხშაბათი, 4:00 საათი) მისცა.