აშშ-ის ვიცე-პრეზიდენტის ჯეი დი ვენსის განცხადებით, ირანთან მიღწეული ცეცხლის შეწყვეტა „მყიფე ზავია“ და ირანში არიან ადამიანები, რომლებიც შეთანხმებასთან დაკავშირებით სიცრუეს ავრცელებენ.

„ეს მყიფე ზავია. არიან ადამიანები, რომლებსაც აშკარად სურთ მოლაპარაკების მაგიდასთან მოსვლა და ჩვენთან მუშაობა კარგი შეთანხმების მისაღწევად, ასევე არიან ადამიანები, რომლებიც იტყუებიან უკვე მიღწეული მყიფე ზავის შესახებაც კი. პრეზიდენტმა მითხრა და მომლაპარაკებელთა მთელ გუნდს - სახელმწიფო მდივანს, სპეციალურ წარმომადგენელ სტივ უიტკოფს - უთხრა: წადით და კეთილი ნებით იმუშავეთ შეთანხმების მისაღწევად. თუ ირანელები კეთილი ნებით მზად არიან ჩვენთან ითანამშრომლონ, ვფიქრობ, რომ შეგვიძლია შეთანხმების მიღწევა; თუ ისინი აპირებენ ტყუილს, თუ ისინი აპირებენ მოტყუებას, თუ ისინი შეეცდებიან ხელი შეუშალონ ჩვენ მიერ დამყარებულ მყიფე ზავს, მაშინ ისინი არ იქნებიან ბედნიერები“, - აღნიშნა ვენსმა, რომელიც უნგრეთში იმყოფება.

შეგახსენებთ, აშშ-მა და ირანმა ცეცხლის ორი კვირის განმავლობაში შეწყვეტის შესახებ შეთანხმებას მიაღწიეს. პაკისტანის პრემიერ-მინისტრმა შეჰბაზ შარიფმა, რომელიც მოლაპარაკებებს შუამავლობს, განაცხადა, რომ ირანისა და აშშ-ს დელეგაციები მოლაპარაკებებისთვის პარასკევს ისლამაბადში მიიწვია.