„ტისას“ მთავრობა ყველა უნგრელის მთავრობა იქნება, - ამის შესახებ უნგრეთის საპარლამენტო არჩევნებში გამარჯვებული ოპოზიციური პარტია „ტისას“ ლიდერი, პიტერ მადიარი სოციალურ ქსელში წერს.

„მადლობა ყველა უნგრელს როგორც სამშობლოში, ისე მთელი მსოფლიოს მასშტაბით. უდიდესი პატივია, რომ უფლებამოსილება მოგვანიჭეთ, ჩამოვაყალიბოთ მთავრობა, ისტორიაში ყველაზე მეტი ხმით და მომდევნო ოთხი წლის განმავლობაში თავისუფალი, ევროპული და ჰუმანური უნგრეთისთვის ვიმუშაოთ. ჩვენი ქვეყნის უსაფრთხოებისა და განვითარებისთვის, ასევე უნგრელი ხალხის კეთილდღეობისთვის ყოველდღე, 24 საათის განმავლობაში ვიმუშავებ“, - წერს მადიარი X-ზე.

ცნობისთვის, საპარლამენტო არჩევნებში გამარჯვების შემდეგ მხარდამჭერების წინაშე სიტყვით გამოსვლისას, პიტერ მადიარმა განაცხადა, რომ უნგრეთი ევროკავშირისა და ნატო-ს შემადგენლობაში კვლავ სანდო პარტნიორი იქნება.

„უნგრეთი კვლავ სანდო მოკავშირე იქნება, რომელიც უნგრეთის ინტერესებს წარმოადგენს, რადგან ჩვენი ადგილი ევროპაში იყო, არის და იქნება“, - განაცხადა მადიარმა.