დავით ნარმანიას ტროტუარებიც კი გაყიდული დახვდა - რა პირობებში უხდებოდა ამის გამოსწორება, ეს ცალკე თემაა, - ამის შესახებ თბილისის ჯერ კიდევ მოქმედი საკრებულოს თავმჯდომარემ გიორგი ალიბეგაშვილმა რადიო ”პალიტრის” გადაცემა ”რეზიუმეში” განაცხადა. მისივე თქმით, ნარმანიას მერად არჩევის პირველ წელს იყო განსაკუთრებული საბოტაჟი, როცა ორმოების ამოვსებაც კი პრობლემა ხდებოდა.

ალიბეგაშვილი ნარმანიას მერობის პირობებში განხორციელებულ მნიშვნელოვან პროექტებად ახალი საბავშო ბაღების აშენებასა და ავტობუსების შემოყვანას ასახელებს. მისივე თქმით, 7 მილიონი კვადრატული მეტრი გზა შეკეთდა და დაიგო ასფალტი, როცა წინა მერიის პირობებში ერთი მესამედიც ვერ გაკეთდა.

”ბატონი დავითი შეიძლება ცოტა ლოიალური მოეჩვენოს ადამიანს. თავისი ბუნებიდან გამომდინარე, მეტი სიმკაცრე უნდა გამოეჩინა, რომ ვიღაცეებისთვის სალაპარაკო არ მიეცა”, - დასძინა გიორგი ალიბეგაშვილმა.