ვეტერანის დღისადმი მიძღვნილი კვირეულის ფარგლებში, ვეტერანების საქმეთა სახელმწიფო სამსახურის ორგანიზებით, რაგბში ვეტერანის დღისადმი მიძღვნილი ამხანაგური მატჩი გაიმართება.
როგორც „ინტერპრესნიუსს“ ვეტერანების საქმეთა სახელმწიფო სამსახურიდან აცნობეს, შეხვედრაში მონაწილეობას ვეტერანი მორაგბეები და ომისა და სამხედრო ძალების ვეტერანები მიიღებენ. შეხვედრა 16 ოქტომბერს, „შევარდენის“ სანაკრებო ბაზაზე გაიმართება და მასზე დასწრება თავისუფალია.
მატჩს ვეტერანებთან და გულშემატკივრებთან ერთად, საქართველოს მთავრობის წარმომადგენლები და პარლამენტის წევრები დაესწრებიან. მატჩის მონაწილე ორივე გუნდის წევრებს ვეტერანების საქმეთა სახელმწიფო სამსახურის მიერ დაწესებული სამახსოვრო პრიზები და საჩუქრები გადაეცემათ. ვეტერანის დღე 2014 წლის 17 ოქტომბერს დაარსდა და წელს მეოთხედ აღინიშნება.