საქართველოს პარლამენტში ყოველწლიური ანგარიშით დღეს ქვეყნის პრეზიდენტს მიხეილ სააკაშვილს ელოდებიან.

პარლამენტის რეგლამენტის მიხედვით, პარლამენტი, როგორც წესი, საგაზაფხულო სესიის პლენარული სხდომების პირველ დღეს, საქართველოს კონსტიტუციის შესაბამისად ისმენს საქართველოს პრეზიდენტის ყოველწლიურ მოხსენებას ქვეყნის მდგომარეობის უმნიშვნელოვანეს საკითხებზე. პრეზიდენტის მოხსენების შემდეგ ცხადდება ორსაათიანი შესვენება. შესვენების შემდეგ იწყება ფრაქციების თავმჯდომარეთა გამოსვლები, რომელთა ხანგრძლივობას პარლამენტის ბიურო ადგენს. დებატების შემდეგ შეიძლება მიღებულ იქნეს რეზოლუცია.;;; ;

ჯერჯერობით არ არის შეთანხმებული თუ რა ფორმატით წარიმართება დებატები, თუმცა, წინასწარი კონსულტაციების შედეგად, დებატები, სავარაუდოდ, პოლიტიკური დებატების ფორმატში შედგება. კერძოდ,; პოლიტიკურ დებატებში გამოსვლებისათვის უმრავლესობასა და უმცირესობას თითოეულს 45 წუთი ეძლევა, ფრაქციასა და პარლამენტის თავმჯდომარეს (სხდომის თავმჯდომარეს) – თითოეულს 15 წუთი, პარლამენტის თავმჯდომარის მოადგილეს – 10 წუთი, პარლამენტის წევრს, რომელიც არ არის გაერთიანებული არც ერთ ფრაქციაში – 5 წუთი. ფრაქცია, უმრავლესობა და უმცირესობა მათთვის გამოყოფილი დროის ფარგლებში განსაზღვრავენ გამომსვლელთა რაოდენობასა და მათზე დროის გადანაწილების სქემას. პოლიტიკურ დებატებში გამომსვლელთათვის; გამოყოფილი დროის გაზრდა დაუშვებელია.

უკვე ცნობილია ის გარემოებაც, რომ საპარლამენტო უმცირესობის ლიდერი გიორგი თარგამაძე მისი დროის დარჩენილ ნაწილს, უმცირესობაში შემავალ დეპუტატებს დაუთმობს. მათ შორის, თარგამაძის გამოსვლის დროით ისარგებლებს დეპუტატი დიმიტრი ლორთქიფანიძე, რომელსაც დროის დათმობაზე უარი, მისივე ფრაქციის თავმჯდომარე გია თორთლაძემ უთხრა.

პრეზიდენტის პარლამენტში სიტყვით გამოსვლისას დებატების ფორმატი საბოლოოდ, დღევანდელ ბიუროს სხდომაზე შეთანხმდება.

პრეზიდენტი პარლამენტში, სავარაუდოდ, 18:00 საათისთვის მივა.