„ქართული ოცნების“ თავმჯდომარის ირაკლი კობახიძის განცხადებით, „ფრანკლინის კლუბი“ არის უცხოური გავლენის აგენტი, რომელიც ასეულობით ათასი ლარით ფინანსდება.

როგორც მან აღნიშნა, „ფრანკლინის კლუბი“ პოლიტიკური აქტივიზმისთვის ახორციელებს როგორც სტუდენტების, ისე არასრულწლოვანი სკოლის მოსწავლეების რეკრუტირებას.

მისივე ინფორმაციით, სტუდენტების მობილიზაცია ორი უნივერსიტეტის „თავისუფალი უნივერსიტეტისა“ „საქართველოს უნივერსიტეტის“ ბაზაზე ხდება.

„გასული კვირის განმავლობაში განვითარებულმა მოვლენებმა, ჩვენ მოგვცა ექსტრემისტული ახალგაზრდული პოლიტიკური დაჯგუფებების გაშიფვრის შესაძლებლობაც. სწორედ ამ დაჯგუფებების მეშვეობით იყო ორგანიზებული ძალადობრივი ქმედებები სახელმწიფოს წინააღმდეგ. თავად „ნაციონალურ მოძრაობასთან“, „გირჩი - მეტი თავისუფლებასთან“, „სირცხვილიასთან“ და „დროასთან“ ერთად, გასულ კვირაში გამოიკვეთა „ფრანკლინის კლუბის“ აქტიურობა. „ფრანკლინის კლუბი“ არის უცხოური გავლენის აგენტი, რომელიც ასეულობით ათასი ლარით ფინანსდება. მისი მხარდამჭერია ამერიკული ორგანიზაცია „ატლას ნეთვორქი“, რომელიც წარსულში არაძალადობრივ და ძალადობრივ პროტესტს აორგანიზებდა მსოფლიოს არაერთ ქვეყანაში, ასევე აქტიურად მუშაობდა „ბრექსიტზე“, ანუ ევროკავშირიდან დიდი ბრიტანეთის გამოყოფაზე.

„ფრანკლინის კლუბი“ პოლიტიკური აქტივიზმისთვის ახორციელებს როგორც სტუდენტების, ისე არასრულწლოვანი სკოლის მოსწავლეების რეკრუტირებას. სტუდენტების მობილიზაცია წარმოებს არსებითად ორი უნივერსიტეტის ბაზაზე. ესენია - კახა ბენდუქიძის მიერ თავის დროზე 1 ლარად მითვისებული „თავისუფალი უნივერსიტეტი“ და გიული ალასანიას მიერ ასევე 1 ლარად მითვისებული „საქართველოს უნივერსიტეტი“. აქტივობებისათვის „ფრანკლინის კლუბი“ აქტიურად იყენებს „საქართველოს უნივერსიტეტის“ ინფრასტრუქტურას. კლუბის მრჩეველთა საბჭოს წევრები არიან ორივე ზემოაღნიშნული უნივერსიტეტის რექტორები, ვატო ლეჟავა და კონსტანტინე თოფურია, აგრეთვე სხვა რეაქციონერი ნაციონალები, როგორებიც არიან ლევან რამიშვილი, გია ნოდია და სხვები. „ფრანკლინის კლუბში“ ტრენინგებს ატარებენ ზურაბ ჯაფარიძე, გიორგი მშვენიერაძე, გიორგი მელაძე და ოპოზიციის სხვა ექსტრემისტი ლიდერები, რომლებიც მსმენელებს რევოლუციურ გეგმებზე დაუფარავად ესაუბრებიან“, - განაცხადა კობახიძემ.

მისივე თქმით,“ გასულ კვირაში არსებითად სწორედ რადიკალური ოპოზიციის ექსტრემისტული ახალგაზრდული დაჯგუფებების მიერ იყო ორგანიზებული ძალადობრივი აქტები, რომლებიც სამართალდამცავი სტრუქტურების წინააღმდეგ განხორციელდა“.

„ექსტრემისტული აქტივობები ძირითადად ხორციელდებოდა ჯინ შარპისა და პიტერ აკერმანის მიერ შემუშავებული სახელმძღვანელოების შესაბამისად. მათ შორის, სწორედ ამ სახელმძღვანელოებშია აღწერილი ისეთი სიმბოლური აქტები, როგორიცაა წყლის ჭავლთან დროშიანი მომიტინგის დაპირისპირება, სპეცრაზმელებთან ყვავილების მიტანა და ა.შ.

აგენტების კანონის წინააღმდეგ აგორებულ პროტესტს წითელ ხაზად გასდევდა კამპანია, რომელიც ლიბერალური ფაშიზმის „საუკეთესო“ ტრადიციების შესაბამისად იყო დაგეგმილი. ორგანიზებული ჯგუფების მეშვეობით, ხორციელდებოდა უპრეცედენტო ზეწოლა პოლიტიკოსებზე, ცნობად სახეებზე და მათი ოჯახის წევრებზე, მათ შორის არასრულწლოვნებზე. გარდა ექსტრემისტული ახალგაზრდული პოლიტიკური დაჯგუფებებისა, ლიბერალური ფაშიზმის კამპანიაში დღემდე აქტიურად არიან ჩართული ოპოზიციონერი პოლიტიკოსები, ყოფილი სახალხო დამცველი, რადიკალური ოპოზიციის მხარდამჭერი ჟურნალისტები, ენჯეოების წარმომადგენლები, ისევე, როგორც რიგითი ნაციონალები. ლიბერალური ფაშიზმი ნაცმოძრაობის ძალადობრივი ბუნების კიდევ ერთი გამოხატულებაა“, - განაცხადა კობახიძემ.

თუ საქართველოს კანდიდატის სტატუსის მიღებას საფრთხე დაემუქრება, ხელისუფლებამ პასუხი უნდა აგოს - ასეთ შემთხვევაში პოლიტიკური კრიზისის განმუხტვის მექანიზმი არის ვადამდელი არჩევნები, - ამის შესახებ „სტრატეგია აღმაშენებლის“ დეპუტატმა პაატა მანჯგალაძემ განაცხადა.

მისი თქმით, ახლა მთავარი მოთხოვნა „არა რუსულ კანონს“ იყო.

„ახლა ასე მკაცრად არ ყოფილა დაყენებული მოთხოვნა „არა რუსულ ხელისუფლებას“, ეს რომ ყოფილიყო მოთხოვნა, ახლა ხალხი ქუჩაში იქნებოდა. მე პირადად ვამბობ, რომ „არა რუსულ კანონს“ არ არის საკმარისი მოთხოვნა, მაგრამ ობიექტურად შევხედოთ - „არა რუსულ ხელისუფლებას" იქ შეკრებილი ყველა ადამიანის მოთხოვნა არ ყოფილა, რადგან ხალხი ფიქრობს, რომ "ქართული ოცნების" პირობებში ჯერ კიდევ შეიძლება სტატუსის მიღება და ასე მკაცრად არ აყენებს ხელისუფლების გაშვების მოთხოვნას, მაგრამ იმდენად უნდათ ევროპა, რომ როგორც კი კითხვის ნიშნის ქვეშ დააყენებს „ქართული ოცნება" სტატუსის მიღების საკითხს, პირველი ვიქნები, ვინც რიგგარეშე არჩევნებს მოითხოვს“, - განაცხადა მანჯგალაძემ.

ის ასევე გამოეხმაურა პიტერ სტანოს განცხადებას, რომ ამ კანონის მიღებით „ქართული ოცნება“ 12-დან 2 პუნქტს არღვევდა და აღნიშნა, რომ ამ კანონპროექტის მიზანი სტატუსისთვის საბოტაჟი იყო.

„ამას როცა აკეთებ, რუსი ხარ! ამერიკული კანონის მიღებას გვთხოვდა ლავროვი და ამიტომ გაგვიბრაზდა?! რუსი პროპაგანდისტები აქებენ ჩვენს ხელისუფლებას, მეტი რა უნდა მოხდეს, სალავიოვი, რომელიც ვერ იტანს ქართველ ერს, აქებს ღარიბაშვილს, ეს ღალატი არ არის?! ახლა საუბრობენ, რომ 4-მა დეპუტატმა შეიძლება დატოვოს „ქართული ოცნება“, მიკვირს 4 კი არა, უმრავლესობა რატომ არ ტოვებს „ქართულ ოცნებას“?! ეს ძალა არსად წასულა. ნახეს, რომ ჰიბრიდულმა ომმა არ იმუშავა, ახლა ემზადებიან, რომ უფრო მოასწორონ ეს სივრცე. იმ ხალხის დევნა თუ დაიწყება, ვინც რუსულ კანონს აპროტესტებდა, ეს იქნება პირველი ნიშანი. თუ დევნა დაიწყება, კვლავ უნდა გამოვიდეთ ქუჩაში მათ დასაცავად. ეს იმას ნიშნავს, რომ „ქართულმა ოცნებამ" ტაქტიკურად დაიხია უკან, ამოისუნთქა და გადმოვიდა შეტევაზე, ჯერ ამ ადამიანების დევნას დაიწყებენ, მერე ამოიღებენ მიზანში მედიას, რადგან თუ ვინმეს მადლობა ეკუთვნის არიან ის ახალგაზრდები და მედია, რომელმაც ადამიანებამდე სიმართლე მიიტანა“, - განაცხადა მანჯგალაძემ.