დიახ, ჩვენ გვექნება უთანხმოება ქართველ პარლამენტართანაც, უცხო ქვეყნის პარლამენტართანაც, ევროპარლამენტართანაც, რომლისთვისაც სააკაშვილი არის სინათლე და სხვა დანარჩენი - სიბნელე, - ამის შესახებ საპარლამენტო უმრავლესობის წევრმა ირაკლი ჩიქოვანმა პარლამენტში განაცხადა, სადაც ინტერპელაციის წესით პრემიერ-მინისტრს უსმენენ.

მისი შეფასებით, თუ არ გავიაზრეთ რა ხდებოდა 9 წლის განმავლობაში საქართველოში და თუ ამას არ მივეცით ადეკვატური შეფასებები, ეს მუდმივ პრობლემად დარჩება.

„ჩვენ, სამწუხაროდ ვხედავთ იმას, რომ სახელმწიფოს რეკეტის შემოქმედები, დღეს პოლიტიკური ექსტრემიზმის შემოქმედებად მოგვევლინენ. ზუსტად ეს არის მთავარი პრობლემა. იმის შეთავაზება, რომ თქვენ გჭირდებათ პოლიტიკური რევანშიზმი, საზოგადოებაში ვერასდროს მოიკიდებს ფეხს. ვერასდროს ვერ მოიკიდებს ფეხს ის, რომ „ქართულ ოცნებას“ აკიდოთ რუსული იარლიყი. 2012 წელს „ქართულმა ოცნებამ“ მოიგო ბრძოლა არა ხელისუფლებისთვის, არამედ ბრძოლა ღირსებისთვის. მაშინაც, 2012 წელს, თქვენ „ქართულ ოცნებას“ რუსულს უწოდებდით. 2020 წელს „ქართულმა ოცნებამ“ მიიღო მანდატი საკუთარი ამომრჩევლისგან, რომ ეს ქვეყანა წაეყვანა ევროპისკენ და ევროპაში ინტეგრაცია უზრუნველეყო. თქვენ „ქართულ ოცნებას“ მაშინაც რუსულს უწოდებდით. ამიტომ, „ქართული ოცნების“ ამოცანა იყო, არის და დარჩება ჩვენი ქვეყნის ღირსეული ევროპული ინტეგრაცია, ეს არის ობიექტური რეალობა, რომელსაც სხვა ალტერნატივა არ აქვს“,- განაცხადა ჩიქოვანმა.