არსებობს გლობალური ომის პარტია, რომელსაც აქვს ინტერესი, მაქსიმალურად გახანგრძლივდეს უკრაინაში პირველი ფრონტი, საქართველოში გაიხსნას მეორე ფრონტი, სამხედრო კონფლიქტი შეიძლება მათი სურვილის მიხედვით გადავიდეს სხვა ქვეყნებში - ქართული საზოგადოება უნდა იყოს ფხიზლად!- ასე გამოეხმაურა „ქართული ოცნების“ თავმჯდომარე ირაკლი კობახიძე თურქეთის პრეზიდენტის, რეჯეფ თაიფ ერდოღანის განცხადებას, რომ „ბოლო ორი წელი თურქეთის ძალისხმევა რომ არ ყოფილიყო, დასავლური კლუბი თურქეთს რუსეთის წინააღმდეგ ომში ჩაითრევდა“.

მისივე თქმით, ქართულმა საზოგადოებამ საქართველოს უკრაინიზაცია არ უნდა დაუშვას.

„არსებობს გლობალური ომის პარტია, ამაში ვგულისხმობთ ძალიან კონკრეტულ ადამიანებს ანუ არსებობს გლობალური ომის პარტია, რომელსაც აქვს ინტერესი მაქსიმალურად გახანგრძლივდეს, მაგალითად, უკრაინაში პირველი ფრონტი, საქართველოში გაიხსნას მეორე ფრონტი, სამხედრო კონფლიქტი შეიძლება მათი სურვილის მიხედვით გადავიდეს სხვა ქვეყნებში, ეს ძალიან სამწუხარო და შემაშფოთებელია. ამ ფონზე, ჩვენ მთავარია დავიცვათ საკუთარი სახელმწიფო ინტერესები და რაც მთავარია, ქართული საზოგადოება უნდა იყოს ფხიზლად. საქართველოს უკრაინიზაცია არ უნდა დავუშვათ ჩვენ, არ უნდა დაუშვას ქართულმა საზოგადოებამ, ამას სჭირდება ყოველწუთიერი სიფხიზლე. მეორე ფრონტთან დაკავშირებული რისკები არის აქტუალური, საზოგადოება უნდა იყოს ფხიზლად, იმისთვის, რომ გლობალური ომის პარტიას არ მისცეს საკუთარი გეგმების რეალიზების საშუალება საქართველოში“, - განაცხადა კობახიძემ.