საქართველოს საკალათბურთო ნაკრები ევროპის ჩემპიონატზე დღეს ბოლო შეხვედრას გამართავს

საქართველოს საკალათბურთო ნაკრები ლიტვაში მიმდინარე ევროპის ჩემპიონატზე დღეს ბოლო შეხვედრას გამართავს. ქართველი კალათბურთელები საბერძნეთის ნაკრებს დაუპირისპირდებიან . შეხვედრა თბილისის დროით 19.00 საათზე დაიწყება.

მიღებული ტრავმების გამო, ზაზა ფაჩულია და გიორგი ცინცაძე გუნდს დღესაც ვერ დაეხმარებიან.

საბერძნეთთან შეხვედრის შედეგის მიუხედავად, საქართველოს ნაკრები ევრობასკეტ-2011-ს გამოეთიშება. მეოთხედფინალში გასასვლელად ნაკრებს არა მხოლოდ საბერძნეთთან, არამედ ფინეთთან გამარჯვებაც სჭირდებოდა, თუმცა ქართველმა კალათბურთელებმა 10 სექტემბერს ფინელებთან მატჩი 73:87 დათმეს.

საქართველოს ნაკრები ევროპის ჩემპიონატის დებიუტანტია. გუნმდა ბასკეტარენაზე დღემდე შვიდი თამაში გამართა და ორი მოიგო - ბელგიასთან და უკრაინასთან.

ევროპის ჩემპიონატზე იგორ კოკოშკოვის გუნდი ასეთი შემადგენლობით იმყოფება: გიორგი გამყრელიძე, ვლადიმერ ბოისა, ანატოლი ბოისა, ზაზა ფაჩულია, გიორგი ცინცაძე, გიორგი შერმადინი, მანუჩარ მარკოიშვილი, ვიქტორ სანიკიძე, ნიკოლოზ ცქიტიშვილი, თორნიკე შენგელია, მარკიზ ჰეინსი, გიორგი შარაბიძე, ლაშა ფარღალავა.