ქარელის რაიონის სოფელ სარკინეთში წმინდა შიო მღვიმელის სახელობის ეკლესია გაიხსნა. ეკლესია რუის-ურბნისის ეპისკოპოსმა მეუფე იობმა აკურთხა.
ტაძრის კურთხევას მღვდელმთავრები, მიმდებარე სოფლებისა და საქართველოს სხვადასხვა რაიონებში მდებარე ეკლესიების მრევლი დაესწრნენ.
როგორც "ინტერპრესნიუსის" კორესპონდენტი იუწყება, ახალი ტაძრის უნიკალურობა იმაში მდგებარეობს, რომ კლდეშია გამოკვეთილი. ტაძარში შესვლა დაახლოებით 5-მეტრიანი დერეფნიდან არის მოსახერხებელი, რომელიც კლდეშია გაჭრილი.
მეუფე იობის განცხადებით, XIV საუკუნის შემდეგ საქართველოში კლდეში ეკლესია აღარ აშენებულა და სარკინეთის შიო მღვიმელის ეკლესია XIV საუკუნის შემდეგ პირველია, რომელიც კლდის გამოქვაბულში აშენდა.
"ტაძრის გახსნას საქართველოს კათოლიკოს-პატრიარქი ილია მეორე უნდა დასწრებოდა, თუმცა უწმინდესი თურქეთში, მსოფლიო პატრიარქ ბართლომეოსის აღსაყდრებიდან 20 წლის იუბილესთან დაკავშირებით მიემგზავრება", - აღნიშნა მეუფემ.
ტაძრის კურთხევის შემდეგ მეუფე იობმა რუის-ურბნისის ეპარქიის სასულიერო პირები პატრიარქის კურთხევით დააჯილდოვა.