სოფელ ქვემო მლეთაში დაკარგულ 17 წლის გურამ დადიანიძეს სამაშველო სამსახური ისევ ეძებს. ამის შესახებ "ინტერპრესნიუსს" დუშეთის რაიონის გამგებლის მოვალეობის შემსრულებელმა, ქეთევან წიკლაურმა განუცხადა.

მისივე თქმით, დუშეთის რაიონის სამაშველო სამსახურის წარმომადგენელები დაკარგულს გუშინ მლეთა-არახვეთის ტერიტორიაზე ეძებდნენ, თუმცა უშედეგოდ.

გამგებლის მოვალეობის შემსრულებლის თქმით, გუშინ პოლიციამ 11 ივნისს გურამ დადიანიძესთან ერთად მყოფი მისი მეგობრები დაკითხა.

"დაკითხვის დროს ზოგიერთმა მათგანმა განაცხადა, რომ გურამ დადიანიძე ქვემო მლეთის სკოლის მიმდებარე ტერიტორიიდან ვეღარ შენიშნეს, ზოგიერთი კი აცხადებს, რომ ქვემო მლეთაში არსებული ეკლესიის ტერიტორიიდან გაუჩინარდა. მათი ჩვენებები განსხვავებულია. გაურკვეველია, სად დაიკარგა ახალგაზრდა", _ დასძინა წიკლაურმა.

გურამ დადიანიძე ახლობლებთან ერთად ლომისობას, 11 ივნისს, წმინდა გიორგის ტაძარში იმყოფებოდა და უკან მათთან ერთად დაბრუნდა. ახალგაზრდა სოფელ ქვემო მლეთას ტერიტორიაზე გაუჩინარდა.