ფრაქცია "თავისუფალი დემოკრატები" უზენაესი სასამართლოს თავმჯდომარის პოსტზე ნინო გვენეტაძის კანდიდატურას მხარს დაუჭერს.

"ნინო გვენეტაძესთან დაკავშირებით ფრაქციის განწყობა ერთსულოვანია", - ამის შესახებ ჟურნალისტებს ფრაქციის თავმჯდომარემ ირაკლი ჩიქოვანმა ფრაქციის ფორმატში გვენეტაძესთან დახურული შეხვედრის შემდეგ განუცხადა.

"ჩვენ საკმაოდ სიღრმისეული საუბარი გვქონდა. ვისაუბრეთ ძალიან ბევრ საკითხზე. ის ხედვები და მოსაზრებები, რომელიც ნინო გვენეტაძეს აქვს წარმოდგენილი, ვთვლით, რომ სასამართლო სისტემის გაჯანსაღებას წაადგება და ხელს შეუწყობს იმას, რომ სასამართლო ხელისუფლება დამოუკიდებელ სახელისუფლებო შტოდ ჩამოყალიბდეს", - აცხადებს ირაკლი ჩიქოვანი.

თავად უზენაესი სასამართლოს თავმჯდომარეობის კანდიდატი "თავისუფალი დემოკრატებისაგან" მხარდაჭერას ელოდება. როგორც გვენეტაძემ აღნიშნა, დახულ შეხვედრისას დიალოგი პოზიტიურ რეჟიმში წარიმართა. ნინო გვენეტაძის განმარტებით, მან "თავისუფალ დემოკრატებს" გააცნო საკუთარი ხედვები სასამართლო ხელისუფლების ეფექტურობასა და განსჭვრეტადობასთან დაკავშირებით.

ნინო გვენეტაძე ფიქრობს, რომ ის როგორც უზენაესი სასამართლოს მოსამართლე, დიდი პალატის მეშვეობით აქტიურად ჩაერთვება მართლმსაჯულების განხორციელების პროცესში.

გვენეტაძესთან შეხვედრები პარლამენტში მომავალ კვირასაც გაგრძელდება. არსებული ინფორმაციით, მომავალი კვირისთვის გვენეტაძესთან შეხვედრის გამართვას ფრაქცია "კონსერვატორები" გეგმავენ.