დღეს პირველად ვიფიქრე, ტყუილად ხომ არ მოვედი ფეხბურთში, - ამის შესახებ საარჩევნო ყრილობაზე ფეხბურთის ფედერაციის პრეზიდენტობის კანდიდატმა, მამუკა კვარაცხელიამ განაცხადა.

მისი თქმით, 25 წლის წინ თავადაც მიიღო ფეხბურთის ფედერაციის დაფუძნებაში მონაწილეობა, თუმცა დღეს ისევ არეულობა და ქაოსია.

"იმაზეც კი დავფიქრდი, წარვმდგარიყავი თუ არა სიტყვით. პირველად ვიფიქრე, ტყუილად ხომ არ მოვედი ფეხბურთში, ნუთუ 25 წლის მერე კიდევ დარღვევები იქნებოდა და კიდევ არეულობა იქნებოდა. საარჩევნო კანონმდებლობა ბევრ ხარვეზებს შეიცავს. აბსოლუტური ნონსენსია, რომ მხოლოდ 35 დელეგატია", - განაცხადა კვარაცხელიამ.

მისივე თქმით, ის გააძლიერებს ქართულ ფეხბურთს.

"ღმერთმა ქნას, ამ ყრილობამ გააერთიანოს საფეხბურთო სამყარო. წინააღმდეგ შემთხვევაში, ქართული ფეხბურთი ძლიერი ვერ იქნება", - განაცხადა მამუკა კვარაცხელიამ.