თუ კითხვა მდგომარეობს იმაში, მიზანმიმართული დისკრედიტაცია შეიძლება თუ არა - შეიძლება, - ამის შესახებ საპარლამენტო უმცირესობის წევრმა ოთარ კახიძემ ადამიანის უფლებათა დაცვის კომიტეტზე განაცხადა, სადაც იუსტიციის უმაღლესი საბჭოს ინიციატივა მოსამართლეების კრიტიკის "ჩარჩოებში მოქცევასთან" დაკავშირებით, უმრავლესობასა და უმცირესობას შორის კამათის საფუძველი გახდა.

ოთარ კახიძის თქმით, თუ მიზანმიმართული დისკრედიტაცია გასცდება ჟურნალისტური ეთიკის სტანდარტებს, არსებობს თვითრეგულირების ორგანო, ხოლო ცილისწამების შემთხვევებისთვის - სასამართლო. სხვა მხრივ კი, კახიძის თქმით, მედიის სარედაქციო პოლიტიკაში ჩარევა მიუღებელია, მიუხედავად იმისა, რომ დისკრედიტაციული სიუჟეტები შეიძლება მომზადდეს მოსამართლეებზეც, დეპუტატებზეც და ა.შ.

"ეს არის დემოკრატიის ნაწილი",- განაცხადა კახიძემ.

ადამიანის უფლებათა დაცვის კომიტეტის თავმჯდომარემ სოფო კილაძემ თავის მხრივ, აღნიშნა, რომ არ ისურვებდა მსგავს დისკრედიტაციულ სიუჟეტებს არავის მიმართ, რაზეც დეპუტატმა სერგო რატიანმა უპასუხა, რომ "საბჭოთა კავშირში არ არსებობდა ასეთი დისკრედიტაცია".