წინასწარი ინფორმაციით, საკონსტიტუციო ცვლილებებზე ოპოზიციასთან შეხვედრისას მმართველი გუნდის მხრიდან უმრავლესობაში შემავალი ყველა პარტიის წარმომადგენელი მიიღებს მონაწილეობას. საუბარია პარტიებზე, რომლებიც საპარლამენტო უმრავლესობაში შედიან.

ამასთან, ამ ეტაპზე უცნობია, ოპოზიციასთან მოლაპარაკებებში მიიღებს თუ არა მონაწილეობას თავად პარლამენტის თავმჯდომარე და სახელმწიფო საკონსტიტუციო კომისიის ხელმძღვანელი ირაკლი კობახიძე.

ცნობისთვის, გუშინ უმრავლესობის ლიდერის სამუშაო კაბინეტში გამართულ სამუშაო შეხვედრაში საკუთრივ ”ქართული ოცნების” წევრების გარდა მონაწილეობას იღებდნენ „კონსერვატიული პარტიის“, „სოციალ-დემოკრატების“, „მრეწველთა პარტიისა“ და „მწვანეთა პარტიის“ წევრები, რომლებიც ”ქართული ოცნების” უმრავლესობაში არიან.

შეგახსენებთ, რომ მმართველმა გუნდმა კვალიფიციურ ოპოზიციურ პარტიებს საკონსტიტუციო ცვლილების საკითხზე მიმდინარე კვირაში შეხვედრა შესთავაზა. შეხვედრის ზუსტი თარიღი ჯერ უცნობია.