თავდაცვის ინსტიტუციური აღმშენებლობის სკოლაში (DIB) სტრატეგიული კომუნიკაციების კურსი დაიწყო. როგორც „ინტერპრესნიუსს“ თავდაცვის სამინისტროდან აცნობეს, თავდაცვის ინსტიტუციური აღმშენებლობის სკოლაში (DIB) სტრატეგიული კომუნიკაციების კურსი საქართველოს თავდაცვის სამინისტროსა და ნატო-ს სტრატეგიული კომუნიკაციების სრულყოფის ცენტრის (NATO StratCom COE) ერთობლივი თანამშრომლობით დაიწყო.

კურსი საქართველოს თავდაცვისა და უსაფრთხოების სექტორში მომუშავე სტრატეგიული კომუნიკაციების სპეციალისტების მომზადებასა და ნატო-ს სტანდარტებთან დაახლოებას ითვალისწინებს.

ხუთდღიანი ტრენინგის ფარგლებში, მსმენელები სამხედრო-პოლიტიკური გადაწყვეტილების მიღების პროცესში სტრატეგიული კომუნიკაციების მნიშვნელობაზე, ასევე მისი გამართული მუშაობისათვის აუცილებელ წინაპირობებზე პრაქტიკულ ცოდნას მიიღებენ.

კურსს სტრატეგიული კომუნიკაციების მაღალი დონის საერთაშორისო ექსპერტები უძღვებიან.