რუსეთის სამხედრო ხარჯების შემცირების შესახებ დასმულ კითხვას ქვეყნის პრეზიდენტმა ვლადიმერ პუტინმა ანეკდოტით უპასუხა. აღნიშნულ საკითხზე პუტინს შეკითხვით დღეს გამართულ ყოველწლიურ პრესკონფერენციაზე მიმართეს.
„არის ასეთი ანეკდოტი: ყოფილი ოფიცერი ბრუნდება სახლში და საკუთარ იარაღს ვერ პოულობს, შემდეგ კი შვილს ეკითხება - „სად არის ჩემი იარაღი?“ – „მე მეზობელ ბიჭს შენი იარაღი აი, ამ საათში გავუცვალე“, - პასუხობს შვილი. „საათი ნამდვილად კარგია, მაგრამ წარმოიდგინე, ხვალ რომ სახლში ყაჩაღები შემოიჭრნენ, მე და დედა მოგვკლან, ძმები მოგიკლან. შენ რას უპასუხებ? - მოსკოვის დროით 12 საათი და 30 წუთია?
აქედან დასკვნა: სამხედრო საკითხებზე უნდა დაიხარჯოს იმდენი, რამდენიც საჭიროა“, - განაცხადა პუტინმა.
მისი თქმით, რუსეთის სამხედრო ხარჯები არაა „ძალიან გაზრდილი“.
„ჩვენი სამხედრო ხარჯები დაახლოებით 46 მილიარდ დოლარს შეადგენს. შედარებისთვის, აშშ-ს სამხედრო ხარჯები 700 მილიარდი დოლარია“, - აღნიშნა პუტინმა.