სერგეი რიაბკოვი - აშშ-ს განცხადება ჩრდილოეთ კორეაზე სანქციების გაძლიერების თაობაზე შედეგის მომტანი არ იქნება

რუსეთის საგარეო საქმეთა მინისტრის მოადგილის სერგეი რიაბკოვის განცხადებით, აშშ-ს განცხადება ჩრდილოეთ კორეაზე სანქციების გაძლიერების თაობაზე შედეგის მომტანი არ იქნება. „სამწუხაროა, რომ ამერიკის პოზიციაში კვლავ გაჩნდა მოთხოვნების მძლავრი კომპონენტი, რომელიც ფხენიანზე შემდგომ ზეწოლას უკავშირდება. ჩვენ დარწმუნებული ვართ, რომ სასანქციო ზეწოლის ზომები, იქნება ეს გაერო-ს უშიშროების საბჭოს ხაზით თუ არალეგიტიმური ცალმხრივი სანქციები, შედეგის მომტანი არ იქნება“, - განაცხადა სერგეი რიაბკოვმა.

რუსეთის საგარეო საქმეთა მინისტრის მოადგილის თქმით, დროა შეწყდეს მუქარა, ზეწოლა და შანტაჟი და პოლიტიკური გადაწყვეტილების რეალური გზა გამოიძებნოს.

გუშინ, გაერო-ს უშიშროების საბჭოზე სიტყვით გამოსვლისას აშშ-ს სახელმწიფო მდივანმა რექს ტილერსონმა რუსეთსა და ჩინეთს მოუწოდა ჩრდილოეთ კორეაზე ზეწოლა გაზარდონ.