ნიგერიაში გაერო-ს მსოფლიო სასურსათო პროგრამის კოლონაზე თავდასხმის შედეგად ოთხი ადამიანი დაიღუპა

ნიგერიის ჩრდილო-აღმოსავლეთში გაერო-ს მსოფლიო სასურსათო პროგრამის კოლონაზე შეიარაღებული თავდასხმის შედეგად ოთხი ადამიანი დაიღუპა. ამის შესახებ ორგანიზაციის პრესმდივანის განცხადებაზე დაყრდნობით „როიტერსი“ იუწყება.

მისი თქმით, შემთხვევა ბორნოს შტატში, დასახლებული პუნქტის ნგალას სიახლოვეს მოხდა, როდესაც კოლონა ნიგერიელი სამხედროების თანხლებით გზაზე გადაადგილდებოდა.

„ინციდენტის შედეგად ოთხი ადამიანია მოკლული“, - ნათქვამია ორგანიზაციის განცხადებაში.

ნიგერიული გამოცემა Daily Post-ის ინფორმაციით, თავდასხმა ტერორისტიული დაჯგუფება „ბოკო ჰარამის“ მებრძოლებმა განახორციელეს. გამოცემის ცნობით, ტერორისტებმა ერთ-ერთი სატვირთო ავტომობილი დაწვეს და გაიტაცეს სამი ადამიანი.