საქართველოს კონკურენციის სააგენტოს თავმჯდომარე, ნოდარ ხადური ევროკავშირის პროექტის "საქართველოს კონკურენციის სააგენტოს მხარდაჭერა" წარმომადგენლებს შეხვდა, - ამის შესახებ “ინტერპრესნიუსს“ კონკურენციის სააგენტოდან აცნობეს.

სააგენტოს თავმჯდომარის ხელმძღვანელობით, შეხვედრაზე 2017 წელს განხორციელებული აქტივობები შეჯერდა და 2018 წელს განსახორციელებელი პროექტები დაიგეგმა. ნოდარ ხადურმა პროექტის მიზნებსა და ამოცანებზე ისაუბრა.

„პროექტის ყველა მონაწილესადმი ჩემი მოთხოვნა და თხოვნაა, პროექტის ფარგლებში დასახული ამოცანები - ქართულ ბაზარზე ჯანსაღი კონკურენციის გაძლიერება; კონკურენციის კანონმდებლობის სრულყოფა; სააგენტოს თანამშრომელთა კვალიფიკაციის ამაღლება და საერთაშორისო გამოცდილება-პრაქტიკის მაქსიმალური შესწავლა; სხვადასხვა უწყებებთან თანამშრომლობის გაღრმავება; ევროკავშირის საუკეთესო პრაქტიკისა და DCFTA-ის შესაბამისად, კონკურენციის პოლიტიკის მნიშვნელობაზე ქართული საზოგადოების ცნობიერების ამაღლება და ა.შ. პირნათლად შესრულდეს. დიდ იმედებს ვამყარებ და ხელშესახებ შედეგებს მოველი ევროკავშირის დახმარების პროექტისაგან, რაც თქვენი, ევროპელი ექსპერტების გამოცდილების მუდმივ გაზიარებასა და სააგენტოს საქმიანობის ეფექტიანობის ზრდაში უნდა გამოიხატოს“, - განაცხადა ნოდარ ხადურმა.

სააგენტოს თავმჯდომარემ უცხოელ და ქართველ კოლეგებს განხორციელებული საქმიანობისათვის, მხარდაჭერისათვის მადლობა გადაუხადა და იმედი გამოთქვა, რომ სამუშაო, რომელსაც სააგენტო და აღნიშნული პროექტი ერთობლივად ქმნის და ემსახურება, მომავალ 2018 წელს, კიდევ უფრო მეტად წარმატებული და შედეგზე ორიენტირებული იქნება.

შეხვედრას ესწრებოდნენ კონკურენციის სააგენტოს თანამშრომლები, ევროკავშირის პროექტის ექსპერტები - აურელიო ლა ტორე, ფრანსუა სუტი, დიანა მარკოვიჩ ბაიალოვიჩი, ასევე ლიტვის რესპუბლიკის კონკურენციის საბჭოს თავმჯდომარის მოადგილე, იურატე სოვიენე და დომინირებული მდგომარეობის და შერწყმის სამმართველოს უფროსი, იურგიტა ბრესკუტე.