ბრალდებულ გიორგი როსტომაშვილის ადვოკატის, იმედა გოროშვილის განცხადებით, დაცვის მხარისთვის მოსალოდნელი იყო სასამართლოს მიერ დღეს გამოტანილი გამამართლებელი განაჩენი.

როგორც ადვოკატმა აღნიშნა, დაზარალებულმა თავის დროზე გამოძიებას ურთიერთგამომრიცხავი ჩვენებები მისცა, სასამართლოზე კი ყაჩაღობის ფაქტი საერთოდ უარყო. აქედან გამომდინარე, ადვოკატის განმარტებით, სასამართლომ გადაწყვეტილება საქმეში არსებული მტკიცებულებების საფუძველზე მიიღო და მისი დაცვის ქვეშ მყოფი გიორგი როსტომაშვილი გამართლდა.

”დაზარალებულმა საერთოდ უარყო ყაჩაღობის ფაქტი. შესაბამისად, დადგა გამამართლებელი განაჩენი და ამის მოლოდინი გვქონდა. დაზარალებულმა სასამართლოს ნდობა გამოუცხადა. გამოძიებისას იყო მისი ურთიერთგამომრიცხავი ჩვენებები. შესაბამისად, სასამართლომ შეაფასა ისე, როგორც შეაფასა”, - განაცხადა როსტომაშვილის ადვოკატმა.

რაც შეეხება მეორე ბრალდებულის, ნიკოლოზ მჭედლიანის დაცვის მხარის პოზიციას, ადვოკატ სოსო ხარატიშვილის განცხადებით, გამამართლებელი განაჩენი მათთვისაც მოსალოდნელი იყო.

”სასამართლომ აბსოლუტურად სამართლიანი გადაწყვეტილება მიიღო და ეს ეფუძნებოდა მტკიცებულებებს - იმას, თუ რაც იყო სისხლის სამართლის საქმეში. ველოდით ამ გამამართლებელ განაჩენს და შედეგიც თავისთავად სახეზეა”, - განაცხადა იოსებ ხარატიშვილმა.

ბრალდებულები გიორგი როსტომაშვილი და ნიკოლოზ მჭედლიანი დღეს სასამართლო დარბაზიდანვე გათავისუფლდნენ. შეგახსენებთ, რომ გიორგი როსტომაშვილს და ნიკოლოზ მჭედლიანს ბრალი ქურდობასა და ყაჩაღობაში, ასევე ცეცხლსასროლი იარაღის მართლსაწინააღმდეგო ტარებაში ედებოდათ. მიმდინარე წლის მარტის თვეში თბილისში დაფიქსირდა ყაჩაღობის ფაქტი. ბიზნესმენ ლევან შინდელაშვილს იარაღის მუქარით ავტომანქანა და ძვირადღირებული ნივთები მოსტაცეს. აღნიშნულ დანაშაულში ბრალდებულები სწორედ მჭედლიანი და როსტომაშვილი იყვნენ.