კახაბერ გვანცელაძე არასამთავრობო ორგანიზაციების წარმომადგენლებს შეხვდა

თბილისის საბავშვო ბაგა-ბაღების მართვის სააგენტოს ხელმძღვანელი კახაბერ გვანცელაძე ბავშვთა აღზრდისა და განათლების საკითხებზე მომუშავე არასამთავრობო ორგანიზაციების წარმომადგენლებს შეხვდა და სამოქმედო გეგმა გააცნო.

როგორც „ინტერპრესნიუსს“ მერიიდან აცნობეს, შეხვედრა ნაძალადევის მედიათეკაში გაიმართა, რომელსაც ათამდე არასამთავრობო ორგანიზაციის წარმომადგენელი ესწრებოდა.

მათივე ცნობით, სამოქმედო გეგმის წარდგენის შემდეგ, შეხვედრა კითხვა-პასუხის რეჟიმში წარიმართა და მსჯელობა ძირითადად, მასწავლებელთა პროფესიული განვითარების აუცილებლობას, საგანმანათლებლო პროგრამების დახვეწასა და ინკლუზიური განათლების ხელშეწყობას ეხებოდა.

მერიის ინფორმაციით, შეხვედრაზე ხაზი გაესვა მსგავსი სამუშაო დისკუსიების გამართვის მნიშვნელობას, რაც სკოლამდელი აღზრდისა და განათლების სისტემის განვითარებისთვის აუცილებელია.