გიორგი აბაშიშვილი 2008 წლის ომის შედეგად დევნილ მოზარდებსა და ვეტერანთა შვილებს შეხვდა

საქართველოს პრეზიდენტის ადმინისტრაციის უფროსი გიორგი აბაშიშვილი პრეზიდენტის სარეზერვო ფონდიდან დაფინანსებული პროექტის ,,მოსწავლეთა სამოქალაქო განათლებისა და ჩართულობისათვის“ მონაწილეებს შეხვდა, რომლებიც 2008 წლის ომის შედეგად დევნილი მოზარდები, ომის ვეტერანთა შვილები, ყრუ და სმენადაქვეითებული ახალგაზრდები არიან.

როგორც „ინტერპრესნიუსს“ პრეზიდენტის ადმინისტრაციის პრესსამსახურიდან აცნობეს, აღნიშნული შეხვედრა ზამთრის სკოლის ფარგლებში, ბაკურიანში, პროექტის განმახორციელებელი ორგანიზაციის, "ქალთა თანადგომა მშიდობისათვის" ორგანიზებით ჩატარდა.

პროექტის ფარგლებში დაგეგმილია ტრენინგები და სემინარები მოსწავლეთა სამოქალაქო განათლებისა და ჩართულობისათვის, კულტურული, შემოქმედებითი და სპორტული ღონისძიებები. ასევე, ბორჯომისა და ბაკურიანის ღირსშესანიშნაობების მონახულება.

ზამთრის სკოლის დასრულების შემდეგ გაიმართება შემაჯამებელი პრეზენტაცია, სადაც ყველა მონაწილეს პროექტის მხარდამჭერების სერტიფიკატები გადაეცემა.