აჭარის უმაღლესი საბჭოს თავმჯდომარე დავით გაბაიძე, განათლების, მეცნიერების, კულტურისა და სპორტის საკითხთა კომისიის თავმჯდომარე ვლადიმერ მგალობლიშვილი, აჭარის მთავრობისა და ბათუმის მერიის წარმომადგენლები, ბათუმის სპორტული ცენტრის 10 წლის საიუბილეო საღამოს დაესწრნენ.

როგორც „ინტერპრესნიუსს“ აჭარის უმაღლესი საბჭოდან აცნობეს, სპორტის განვითარებაში შეტანილი წვლილისთვის დაჯილდოვდნენ სასპორტო ცენტრის დამსახურებული, წარმატებული ახალგაზრდა და პერსპექტიული მწვრთნელები.

მათივე ცნობით, სპორტის განვითარებაში შეტანილი განსაკუთრებული წვლილისათვის დაჯილდოვდა აჭარის უმაღლესი საბჭოს თავმჯდომარე დავით გაბაიძე.

საიუბილეო საღამო კონცერტით დასრულდა, რომელშიც ცენტრის ერთეულთა თანრიგის მოციგურავეები, სინქრონული დასი, ბათუმის ჰოკეისტთა გუნდი, საერთაშორისო ტურნირებზე საქართველოს სახელით მოღვაწე მორის ყვითელაშვილი, ირაკლი მაისურაძე და ქუთაისელი სპორტსმენები მონაწილეობდნენ.