ზვიად რატიანი - არა მხოლოდ ფიზიკური შეურაცხყოფა მომაყენეს, არამედ ფურთხებაც იყო და დამამცირებელი მოპყრობაც, გაიჟღერა კიდეც ბოლოს - "ხომ არ მოვკლათ?!

პოეტი ზვიად რატიანი, რომელიც პოლიციას ცემაში ადანაშაულებს, მასსა და სამართალდამცველებს შორის მომხდარ ინციდენტს იხსენებს. როგორც რატიანი აცხადებს, დაზიანებები, რომელიც სამი შემოწმების შედეგად მას დაუდგინდა, პოლიციელებმა მიაყენეს. მისივე ინფორმაციით, ფიზიკურის გარდა, პოლიციელები მას სხვა სახის შეურაცხყოფასაც აყენებდნენ.

"ის დაზიანებები, რომელიც აღმენიშნება, მიყენებული მაქვს პოლიციისგან. რამდენჯერმე ჩამიტარდა შემოწმება. პირველად გამსინჯა დროებითი მოთავსების იზოლატორის ექიმმა, შემდეგ გამსინჯეს ხეჩინაშვილის სახელობის კლინიკაში და შემდეგ უკვე სამხარაულის სახელობის ექსპერტიზის ბიუროში. მთავარი დაზიანებები მაქვს თავის არეში. თვითონაც ამბობდნენ, რომ სახეში არ დაერტყა არავის. მაქვს დაზიანებები ასევე ზურგზე, ფეხებსა და ხელებზე, მაგრამ ეს უკვე ძირს თრევის შედეგია. იქ არა მხოლოდ ფიზიკური შეურაცხყოფა მომაყენეს, არამედ ფურთხებაც იყო და დამამცირებელი მოპყრობაც. დიდი ხნით მიჭერდნენ ყელში და ვერ ვახერხებდი ჩასუნთქვას", - აღნიშნა რატიანმა.

პოეტი არ უარყოფს, რომ სამართალდამცველებს აგინებდა, თუმცა, აღნიშნავს, რომ ეს იყო იმ ქმედებების შედეგი, რასაც სამართალდამცველები მის წინააღმდეგ ახორციელებდნენ.

"შეიძლება ნასვამობამაც ითამაშა თავისი როლი, მაგრამ ფხიზელიც რომ ვყოფილიყავი, იმ შეურაცხყოფებისა და ფიზიკური წამების ფონზე, სულაც არ გამოვრიცხავ იგივე რეაქცია მქონოდა. გინება არ არის ჩემი საუკეთესო და ძლიერი მხარე, მაგრამ ამ შემთხვევაში ვიყავი აბსოლუტურად უკონტროლო, მათ შორის ჩემი ლექსიკიდან. ალბათ არის კადრები, სადაც თვითონ ანგელოზებად ჩანან და მომიწოდებენ მოქალაქეს ზრდილობისკენ იმ მოკლე პერიოდში, მე კი განვაგრძობ ჩემს ბილწსიტყვაობას. რომც არ ყოფილიყო კადრები, მე ამას არც დავმალავდი", - განაცხადა რატიანმა.

მისივე თქმით, არ ახსოვს თუ რამდენი პოლიციელი მონაწილეობდა მასზე ფიზიკურ ძალადობაში, თუმცა აღნიშნავს, რომ სახეზე რამდენიმე მათგანი დაიმახსოვრა და მათ ამოცნობასაც შეძლებს. მას ასევე არ ახსოვს, ეცვათ თუ არა აღნიშნულ პირებს პოლიციის ფორმები.

"მცემეს რამდენჯერმე. ყველაზე დიდხანს მცემდნენ დროებითი მოთავსების იზოლატორთან, სანამ შემიყვანდნენ. გაიჟღერა კიდეც ბოლოს - "ხომ არ მოვკლათ?!". პოტენციურად ისინი არიან მკვლელები. უნდა მოხდეს ამ ყველაფრის გამოძიება. არ ვიცი, როგორ შეაფასებს სასამართლო ჩემს რეაქციებს, მაგრამ ჩემი არაადეკვატური საქციელი იყო პასუხი მათ გაცილებით უფრო არაადეკვატურ ქმედებებზე", - განაცხადა რატიანმა.

ვალერი სოლოვეი - კრემლის ქმედებების მოაზროვნე გამმართლებლები, ვინც საქართველოს საქმეებში ჩახედულია, თვლიან, რომ რუსეთს აღარ შეუძლია საქართველოს  პოლიტიკაზე გავლენის მოხდენა
ქართული პრესის მიმოხილვა 23.08.2019
ვახტანგ ძაბირაძე -  შემოდგომა იქნება ოპოზიციურ ფლანგზე ძალების ჩამოყალიბების პროცესი, ამიტომ არ მაქვს მოლოდინი, რომ ცხელი შემოდგომა გვექნება
ქართული ყავის კომპანია „მეამა“-ს შენობა საერთაშორისო არქიტექტურული კონკურსის სამეულშია
პროექტ „ბათუმი რივიერასთან“ დაკავშირებით „სილქროუდ ჯგუფი“ განცხადებას ავრცელებს
პრემიუმ ხარისხის მინების ყველაზე მსხვილი იმპორტიორი კომპანია „ჯეო გლასს“ საკუთარ მომხმარებლებს სიახლეს სთავაზობს