დუისის პოლიციასთან ადგილობრივი მოსახლეობა საპროტესტო აქციას მართავს. პანკისელები გუშინ ჩატარებული სპეცოპერაციის დროს სამართალდამცავების მხრიდან ძალის გადამეტებაზე საუბრობენ და ხელისუფლებას მოუწოდებენ, შეწყდეს მსგავსი მოქმედებები.

”მთელი სოფელი აქ ვართ, როგორ ფიქრობთ, დაკავებულებიდან რომელიმე დამნაშავე ან ტერორისტი რომ იყოს, აქ მოვიდოდით? ეს არის სახელმწიფოსგან დანაშაული, როდესაც მძინარეს ესვრიან. მცირეწლოვან ბავშვებს აშინებენ, ჩვენ გვინდა მშვიდობა“, - განაცხადა აქციის მონაწილე ზაირა მარგოშვილმა.

სუს-მა გუშინ 5 პირი დააკავა, აქედან 4 პანკისში, ერთი კი - თბილისში. ყველა მათგანს თბილისში, ბერი გაბრიელ სალოსის გამზირზე ჩატარებული სპეცოპერაციისას განეიტრალებულ პირებთან კავშირი და მათი დახმარება ედება ბრალად. პანკისში ჩატარებული სპეცოპერაციის დროს ერთი პირი დაიჭრა.

საქართველოს მთავარმა პროკურატურამ პანკისის ხეობაში გუშინ ჩატარებულ სპეცოპერაციასთან დაკავშირებით გამოძიება დაიწყო.