როცა რამდენიმე მამაკაცი იკრიბება მწვავე საკითხის გარშემო, ბუნებრივია, ხმის ტონალობაც არის მაღალი, - ასე უპასუხა საპარლამენტო უმრავლესობის წევრმა მარიამ ჯაშმა ჟურნალისტების შესაბამის შეკითხვას, თუ ვის შორის იყო კამათი ჯანდაცვის კომიტეტის თავმჯდომარის სათათბირო ოთახში.

რაც შეეხება იმას, რომ ჯანდაცვის კომიტეტის სხდომა ვერ დაიწყო, ამის მიზეზად ჯაშმა კვორუმის უქონლობა დაასახელა.

"კვორუმი არ იყო და ვერ იწყებოდა სხდომა, თუმცა ახლა არის და სხდომა გაიმართება. ნარკოპოლიტიკა არის სენსიტიური თემა და მასზე არის აზრთა სხვადასხვაობა. ეს არაერთხელ დაფიქსირებულა ჩვენს დეპუტატებს შორის. ჩვენ ვაგრძელებთ კონსულტაციებს, როგორც აკადემიურ წრეებთან, არასამთავრობო ორგანიზაციებთან, ისე აღმასრულებელ ხელისუფლებასთან. დღევანდელ შეხვედრაზე მოვისმენთ ცვლილებების სამუშაო ვერსიას და დაისმება კითხვები. მთავარია, რომ ამ საკითხთან დაკავშირებით დიალოგი გრძელდება. სხვადასხვა პოზიციები მოისმინეთ უკვე არაერთხელ და როცა რამდენიმე მამაკაცი პარლამენტარი იკრიბება მწვავე საკითხის გარშემო, ბუნებრივია, ხმის ტონალობაც არის მაღალი", - განაცხადა მარიამ ჯაშმა.

პარლამენტის ჯანდაცვის და სოციალურ საკითხთა კომიტეტის თავმჯდომარის, აკაკი ზოიძის სათათბირო ოთახში ხმაური იყო. ოთახში კომიტეტის თავმჯდომარე აკაკი ზოიძე, დეპუტატები მარიამ ჯაში, ლევან კობერიძე და მამუკა მდინარაძე იმყოფებოდნენ, როცა იქიდან ხმაურის ხმა გამოდიოდა. დეპუტატები, სავარაუდოდ, ნარკოპოლიტიკის ლიბერალიზაციის საკითხთან დაკავშირებით კამათობდნენ, ვინაიდან არსებული ინფორმაციით, ამ თემაზე უმრავლესობის რამდენიმე დეპუტატს წინააღმდეგობრივი პოზიცია აქვს.

აღსანიშნავია, რომ კომიტეტის სხდომა 15:00 საათზე უნდა დაწყებულიყო, თუმცა კომიტეტის წევრებმა შეკრება მხოლოდ ახლახანს შეძლეს.