ქუთაისის საკრებულოში დღეს კიდევ ერთი ფრაქცია შეიქმნა. ახალი ფრაქცია, "ქართული ოცნებიდან" გამოყოფილმა სამმა დეპუტატმა შექმნა,რომელსაც "ქართული ოცნება - მწვანეები" ეწოდა.

ფრაქციის შემადგენლობაში არიან იმედა საღინაძე, მაია სიმონიძე და ამირან კოპალეიშვილი. ფრაქციას იმედა საღინაძე უხელმძღვანელებს, რომელსაც შესაბამისი თანამდებობრივი სარგო დაენიშნება.

ოპოზიცია ახალი ფრაქციების შექმნას დამატებითი თანამდებობების შექმნის სურვილს უკავშირებს, რაც ბიუჯეტიდან დამატებით თანხების ხარჯვას გამოიწვევს.

უმრავლესობის შემადგენლობაშია ასევე ფრაქცია "ქართული ოცნება", "ქართული ოცნება -კონსერვატორები" და "ქართული ოცნება- მრეწველები", რომლებიც წინა სხდომებზე შეიქმნა. საკრებულოში არის კიდევ ერთი ოპოზიციური ფრაქცია, რომელიც „ნაციონალურ მოძრაობას“ ეკუთვნის.